ރައީސް އޮފީހުގެ އަންޑާ ސެކްރެޓަރީގެ މަގާމުން ދާއޫދު ވަކިކޮށްފި

ރައީސް އޮފީހުން މިމަހުގެ17 ވަނަ ދުވަހުގެ ރޭ އާންމުކުރި ރިޔާސީ ކޮމިޝަންގެ ރިޕޯޓުގައިވާ ގޮތުން ދާއުދޫ، ފުލުހުންނަށް ދިން ބަޔާނުގައި އޭނާ ބުނީ މައްސަލައާ ގުޅިގެން ސަރުކާރުގެ އެއްވެސް އިސް ފަރާތަކަށް ގުޅާފައިނުވާނެ ކަމަށެވެ. ދާއުދޫ ފުލުހުންނަށް ދިން ބަޔާނުގައާއި ކޮމިޝަނަށް ދިން ބަޔާނުގައި ފުށު އެރުންތަކެއް އެބަހުރި ކަމަށާއި އެހެންވެ އެއީ ދޮގު ބަޔާނެއް ކަމަށް ބެލެވޭ ކަމަށް ރިޕޯޓުގައި ބުނެފައިވެ އެވެ.

ރިޕޯޓުގައި ބުނެފައިވަނީ ދާއޫދާއި އެ ދުވަހު ރައުދުއާ ދިމާވި ދާއޫދުގެ ރައްޓެހިންގެ ބަޔާންތަކުގައި ވެސް ފުށުއެރުންތަކެއް ހުރި ކަމަށާއި އެހެންވެ އެމީހުން ތަހުގީގަށް ކަމެއް ސިއްރުކުރާ ކަމަށް ބެލެވޭ ކަމަށެވެ. ޔުމްނު ވެއްޓުނު ފަހުން އޭނާ ހޯދަން ރައުދު މަސައްކަތްކޮށްފައިވާ ކަން ފުޓޭޖުތަކުން އެނގޭ ކަމަށާއި ނަމަވެސް، އޭގެ ފަހުން ދާއޫދާއި އޭނާގެ ރައްޓެހިންނާ ރައުދު ދިމާވި ފަހުން އެ ރޭގެ އެއްވެސް ކަމެއް ހަނދާން ނެތް ކަމަށް ރައުދު ބުނަމުން ގޮސްފައިވާ ކަމަށް ރިޕޯޓުގައި ބުނެފައިވެ އެވެ.

ޔުމްނު ވެއްޓުނު ހާދިސާއަށް ފަހު ރައުދުއާއި ދާއޫދު ބައްދަލުވެފައިވާ ކަމަށާއި އެހެންވެ ޔުމްނު ވެއްޓުނު ވާހަކަ ދާއުދަށް، ރައުދު ކިޔައިދޭނެ ކަމަށް ބެލެވޭ ކަމަށް ރިޕޯޓުގައި ބުނެފައިވެ އެވެ.

އެހެންވެ، ރައުދުއާ އެއްވަރަށް އެކަން ކަމާ ބެހޭ އިދާރާތަކަށް ނާންގައި ތިބުމުގައި އޭނާގެ ބޭބެ ދާއޫދާއި ރައްޓެހިންގެ ބައިވެރިވުން ހިމެނޭކަމަށް ފެންނާތީ، އެ ކަން އިދާރާތަކުން އިތުރަށް ތަހުގީގު ކުރަން ކޮމިޝަނުން ވަނީ ލަފާ ދީފަ އެވެ.