އަމުރަށް ތަބާނުވެ، ފުލުހުންގެ ސައިކަލެއްގައި ޖެއްސި މީހާ 24 ގަޑިއިރު ނުވަނީސް މިނިވަންވެއްޖެ!

ހުޅުމާލޭގައި ބާރު ސްޕީޑުގައި ކާރު ދުއްވައި، ފުލުހުންގެ ސައިކަލެއްގައި ޖައްސައި ފުލުހަކު ޒަހަމްކޮށްލި މައްސަލައިގައި ރޭ ހައްޔަރުކުރި ޒުވާނާ ދޫކޮށްލައިފި އެވެ.

މި މައްސަލައާ ގުޅިގެން ހައްޔަރުކޮށްފައިވަނީ ހ. ފިލިމާގެ/ އައިކް ހައިޝަމް ހަސަން، 18އ. އެވެ.

ފުލުހުން ބުނި ގޮތުގައި އޭނާ ހައްޔަރުކުރީ ހުޅުމާލެގައި ބާރު ސްޕީޑުގައި ދުއްވާފައިދާތީ ކާރު މަޑުކުރަން ބުނުމުން މަޑުނުކޮށް، ބާރު ސްޕީޑުގައި ފޭސް 1 އާއި 2 ގައި ދުއްވަމުން ދިއުމުން ފުލުހުން އެ ކާރު ފަހަތުން ދާން ފެށުމުން ކާރުން ޖައްސައި ފުލުހުންގެ ސައިކަލު ވައްޓާލުމުންނެވެ.

އެ ވަގުތު ފުލުހުންގެ ސައިކަލުގައި ތިބި ދެ ފުލުހުންގެ ތެރެއިން އެކަކަށް އަނިޔާވެގެން ހޮސްޕިޓަލުގައި ފަރުވާ ދިން ކަމަށްވެސް ފުލުހުން ކުރިން ބުނެފައިވެ އެވެ.

ފުލުހުން މިރޭ ބުނީ، އައިކްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރުތުކުރުމަށް ފަހު ދޫކޮށްލާފައިވާ ކަމަށެވެ. އަދި އެ މައްސަލައާ ގުޅިގެން ފުލުހުންގެ ބެލުމުގެ ދަށަށް އެރޭ ގެންދިޔަ އަންހެން މީހާ އެރޭ ދޫކޮށްލާފައިވާ ކަމަށް ބުންޏެވެ.