އަހަރުގައި ބާކީ 5 މަސް، ސަބްސިޑީއަށް ކަނޑައެޅި ބަޖެޓްގެ 99 ޕަސެންޓް ހުސްވެއްޖެ!

މި އަހަރަށް ފާސްކުރި ބަޖެޓުގައި ސަބްސިޑީއަށް ކަނޑައަޅާފައިވާ އަދަދުގެ 99 ޕަސެންޓް ހުސްވެފައިވާ ކަމަށް ފިނޭންސް މިނިސްޓްރީގެ ހިސާބުތަކުން ދައްކައިފި އެވެ.

މި އަހަރަށް ފާސްކޮށްފައިވާ 56.6 ބިލިއަން ރުފިޔާގެ ބަޖެޓުގެ ތެރެއިން ސަބްސިޑީއަށް ކަނޑައަޅާފައިވަނީ 1.85 ބިލިއަން ރުފިޔާ އެވެ.

ފިނޭންސް މިނިސްޓްރީން އާންމުކޮށްފައިވާ ހަރަދުތަކާއި ލިބިފައިވާ އާމްދަނީގެ ތަފާސްހިސާބުތައް ދައްކާ ގޮތުން، މި މަހުގެ ހަތްވަނަ ދުވަހާ ހަމައަށް ސަބްސިޑީ ދިނުމަށް ކަނޑައަޅާފައިވާ ބަޖެޓުގެ ތެރެއިން 1.83 ބިލިއަން ރުފިޔާ ވަނީ ހޭދަކޮށްފަ އެވެ.

އެހެންކަމުން އަހަރުގައި ބާކީ އޮތް ފަސް މަސް ދުވަހަށް ސަބްސިޑީ ދިނުމަށް ބާކީ އޮތީ އެންމެ 23 މިލިއަން ރުފިޔާ އެވެ.

އާސަންދައަށް މި އަހަރު ކަނޑައަޅާފައިވާ 1.8 ބިލިއަން ރުފިޔާގެ ތެރެއިން އަހަރުގެ މިހާތަނަށް ހޭދަކޮށްފައިވަނީ 1.1 ބިލިއަން ރުފިޔާ އެވެ. އެހެންކަމުން އާސަންދައަށް ކަނޑައަޅާފައިވާ ބަޖެޓުން ބާކީ އޮތީ 683 މިލިއަން ރުފިޔާ އެވެ.