ވިހެއުމުގެ ޗުއްޓީގެ މައްސަލައަކާ ގުޅިގެން ނަދާ ސެލޫން ހައިކޯޓަށް 

ނަދާ ސެލޫން އެންޑް އެސްތެޓިކްސް ސްޓޫޑިއޯގައި މަސައްކަތް ކުރާ އަންހެން މުވައްޒަފަކު ވިހެއުމާ ގުޅިގެން ނެގި ޗުއްޓީއާއެކު އުފެދުނު ހިލާފުތަކެއްގެ މައްސަލަ އެ ސެލޫނުން ހައިކޯޓަށް ހުށަހަޅައިފި އެވެ.

މި މައްސަލައަކީ 2018 ވަނަ އަހަރުން ފެށިގެން އެ ސެލޫންގައި މަސައްކަތް ކުރަމުން ގެންދިޔަ މުވައްޒަފަކު، ވިހެއުމާ ގުޅިގެން ނެގި ޗުއްޓީއަކާއެކު އުފެދުނު މައްސަލައެކެވެ.

އެ މުވައްޒަފު ވަޒީފާއާ ބެހޭ ޓްރައިބިއުނަށް ހުށަހެޅި މައްސަލައިގައި ވަނީ މިދިޔަ އަހަރުގެ ޖުލައި މަހު، އެ މުވައްޒަފު އަހަރީ ޗުއްޓީއެއް ނެގުމަށް ފަހު، ވިހެއުމާ ގުޅިގެން ދޭ ޗުއްޓީގެ ތިން މަސް ދުވަސް ނެގުމުން، އެ ތިން މަސް ދުވަހަށް މުސާރަ ދީފައި ނުވާކަމަށެވެ.

އެ މުއްދަތަށް މުސާރަ ދީފައިނުވަނީ ގާނޫނާހިލާފަށް ކަމަށް ކަނޑައަޅައި ދިނުމަށާއި ވަޒީފާއިން ވަކިކޮށްފައިވަނީ އެކަށީގެންވާ ސަބަބެއް ނެތި ކަމަށް ކަނޑައަޅައިދީ، އެ މުއްދަތުގެ މުސާރަ އާއި އިނާޔަތްތައް ނަގައިދިނުމުގެ އެ ފަރާތުން ވަނީ އެދިފަ އެވެ. މީގެ އިތުރުން މައްސަލަ ޝަރީއަތަށް ހުށަހެޅުމަށް ޚަރަދުވީ 35،000 ރުފިޔާ ނަގައިދިނުމަށް ވެސް އޭނާ އެދިފައިވެއެވެ.

އެ މައްސަލައާ ގުޅިގެން ޓްރައިބިއުނަލަށް ހާޒިރުވުމަށް ނަދާ ސެލޫނަށް އެނގި ނަމަވެސް ހާޒިރުވެފައިނުވެ އެވެ.

އެހެންވެ ނަދާ ސެލޫންގެ ޣައިރު ހާޒިރުގައި ނިންމި ނިންމުގައި ވަނީ  މުވައްޒަފު ވަޒީފާއިން ވަކިކޮށްފައިވަނީ އެކަށީގެންވާ ސަބަބެއް ނެތި ކަމަށާއި، އެ މުވައްޒަފަށް ވިހެއުމާ ގުޅިގެން ދޭން ޖެހޭ ޗުއްޓީ ދިނުމުގައި ސެލޫނުން ވަޒީފާއާބެހޭ ގާނޫނާ ޚިލާފުވެފައިވާ ކަމަށެވެ.

އެހެންވެ އެމުވައްޒަފުގެ ތިން މަހުގެ މުސާރައަށްވާ 48،600 ރުފިޔާއާއި ގެއްލުމުގެ ބަދަލުގެ ގޮތުގައި 97،200 ރުފިޔާގެ އިތުރުން ރޯދަ މަހު އިނާޔަތަށް 3000 ރުފިޔާ އާއި ވަކީލު ފީގެ ގޮތުގައި 35000 ރުފިޔާ ދޭން ޖެހޭ ކަމަށް ޓްރައިބިއުނަލުން ނިންމި އެވެ.

ޓްރައިބިއުނަލްގެ އެ ނިންމުން ބަލައިނުގަނެ ނަދާ ސެލޫން ވަނީ އެ ނިންމުން ހައިކޯޓުގައި އިސްތިއުނާފުކޮށްފަ އެވެ. ނަމަވެސް ހައިކޯޓުން އަދި އެ މައްސަލަ ބަލައިގަތުމާމެދު ގޮތެއް ނުނިންމަ އެވެ.