ނޫސްވެރިން ލާންވީ ޖަލަށް ނޫން ކަމަށާއި އެ މީހުން ”އުލުބައިންދަންވީ“ ކަމަށް ވިދާޅުވެ ޕީއެންސީގެ ޕީޖީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހު މަޖިލީހުގެ ޖަލްސާގައި ގޮވާލެއްވި މައްސަލަ ތަހުގީގު ކުރުމާ މެދު ލަފާ ހޯދަން ޕްރޮސިކިއުޓާ ޖެނަރަލްގެ އޮފީހަށް ހުށަހަޅާފައިވާ ކަމަށް ފުލުހުން މިރޭ ބުނެފި އެވެ.
ފަލާހު އެގޮތަށް ގޮވާލި މައްސަލަ ފުލުހަށް ހުށަހަޅާފައިވަނީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގެ ފަރާތުން ކަމަށެވެ.
އެ މައްސަލައިގެ އަޕްޑޭޓް ހިއްސާ ކުރުމުގެ ގޮތުން ފުލުހުން މިރޭ ބުނީ “ރައްޔިތުންގެ މަޖިލީހުގެ މެންބަރަކު މަޖިލީހުގެ ތަޅުމުގައި ދައްކާފައިވާ ވާހަކައަކާ ގުޅިގެން މޯލްޑިވްސް ޖާނަލިސްޓްސް އެސޯސިއޭޝަނުން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް އެދި، ދިވެހި ފުލުހުންގެ ޚިދުމަތުން 2025 އޮގަސްޓު 28 ވަނަ ދުވަހު، ޕްރޮސެކިއުޓަރ ޖެނެރަލްގެ އޮފީހަށް ވާނީ ހުށަހަޅާފައި” ކަމަށެވެ.
އެމްޖޭއޭގެ ފަރާތުން އެ މައްސަލަ ބަލައިދިނުމަށް އެދި ޕޮލިސް ކޮމިޝަނަރު އިސްމާއީލް ނަވީންއަށް ވަނީ ސިޓީއެއް ފޮނުވައިފަ އެވެ.
އަދި އެމްޖޭއޭއިން ނެރުނު ބަޔާނެއްގައި ބުނީ އިސްލާމްދީނުގެ މައިގަނޑު އަސާސްތަކުގެ ތެރޭގައި އެއްވެސް މީހަކަށް އަނިޔާވެރިނުވުން ހިމެނޭއިރު، ފަލާހް ދެއްކެވި ވާހަކައަކީ އިސްލާމްދީނުގެ އަސްލަކާ ހިލާފު ވާހަކައެއް ކަމަށެވެ.
އެކަމަކީ ނޫސްވެރިންނާއި މީޑިއާތަކުގައި މަސައްކަތްކުރާ މީހުންނަށް އެކަމުގެ ސަބަބުން ބިރުވެރިކަމުގެ ތެރެއަށް ވެއްޓޭ ކަމަށާއި އެއީ މުޖުތަމައުގެ އަމަންއަމާންކަން ގެއްލި ހަމަނުޖެހުމަށް ގައުމު ވެއްޓިގެން ހިނގައިދާނެ ފަދަ ވާހަކަތަކެއް ކަމަށް ވެސް އެ ބަޔާނުގައިވެ އެވެ.

ގުޅުންހުރި
ލައްކައަށް ވުރެ ގިނަ ފައިސާއާއި މަސްތުވާތަކެއްޗާއެކު މީހަކު ހައްޔަރުކޮށްފި
މީޑިއާ ކޮންޓްރޯލް ބިލު ބޭރުނުކުރާނެކަމަށް އުޝާމް ވިދާޅުވުމުން ބައްދަލުވުމުން ނޫސްވެރިންތަކެއް ނިކުމެއްޖެ
އުލުބައިންދާ ވާހަކައަށް ހަލީލާއި އަސްވާޑުގެ ބަހެއް ނެތް
ހުޅުމާލެއިން މީހަކު ގެއްލިގެން ހޯދަނީ
މުޒާހަރާއިން ހައްޔަރުކުރި ނޫސްވެރިން ދޫކޮށްލައިފި
ނޫސްވެރިން އިހުތިޖާޖު ކުރަމުން ދަނިކޮށް މީޑިއާތަކަށް ދޭ މާލީ އެހީތެރިކަމަށް ކުރިމަތިލުމަށް