އަގު ކޮންޓްރޯލް ކުރަން އެސްޓީއޯ އިން އޮރެންޖު އެތެރެކޮށް ވިއްކަން ފަށައިފި، ކިލޯއެއް 35ރ. އަށް

ބާޒާރުގައި އޮރެންޖުގެ އަގު މައްޗަށް އުފުލުމާއި ގުޅިގެން އެސްޓީއޯ އިން ރާއްޖެއަށް އޮރެންޖު ޝިޕްމަންޓެއް އެތެރެކޮށް، ވިއްކަން ފަށައިފި އެވެ.

އެސްޓީއޯ އިން މިއަދު ބުނީ އެ ކުންފުނިން އޮރެންޖު ކިލޯއެއް ވިއްކަން ފަށާފައިވަނީ 35ރ. އަށް ކަމަށެވެ. އެ އަގުގައި ރީޓެއިލްކޮށް އެސްޓީއޯ ޕީޕަލްސް ޗޮއިސް އިން ލިބެން ހުންނާނެ ކަމަށްވެސް ބުންޏެވެ.

މިދިޔަ މަހު މޭވާގެ ބާވަތްތަކުގެ އަގު ވަނީ މިދިޔަ އަހަރުގެ އެ މުއްދަތަށްވުރެ، ދިހަ ޕަސެންޓް އުފުލިފަ އެވެ.

ބާޒާރުގައި ތަކެތީގެ އަގު ބޮޑުވަމުންދާ ނަމަ، އެސްޓީއޯ އިން އާންމުކޮށް އެ ތަކެތި އެތެރެކޮށް އަގު ކޮންޓްރޯލް ކުރެ އެވެ. އެގޮތުން ދާދި ފަހުން ފިޔާގެ އަގު މައްޗަށް ދިއުމުން ވެސް، އެސްޓީއޯ އިން ވަނީ ފިޔާ އެތެރެކޮށް ހެޔޮ އަގުގައި ވިއްކައިފަ އެވެ.