ޣައްޒާ ސަމިޓަށް ވަޑައިގަތް ގަތަރުގެ ތިން ޑިޕްލޮމެޓަކު ކާރު އެކްސިޑެންޓެއްގައި މަރުވެއްޖެ

ޣައްޒާއަށް ދާއިމީ ސުލްހައެއް ގެނައުމާ ގުޅޭ ގޮތުން މިސްރުގައި މާދަމާ ފަށާ ބައިނަލްއަގުވާމީ ސަމިޓަށް ދަތުރުކުރަމުންދިޔަ ގަތަރުގެ ތިން ޑިޕްލޮމެޓަކު ކާރު އެކްސިޑެންޓެއްގައި މަރުވެއްޖެ އެވެ.

މިސްރުގައި ހުންނަ ގަތަރުގެ އެމްބަސީން ބުނީ, ގަތަރުގެ އަމީރީ ދިވާންގެ ތިން މުވައްޒަފުން ދަތުރުކުރަމުންދިޔަ ކާރު އެކްސިޑެންޓްވީ މިސްރުގެ ރެޑް ސީ ރިސޯޓް ސިޓީ ޝާމް އެލް ޝައިހް ކައިރިން ކަމަށެވެ.

އެ އެކްސިޑޭންޓުގައި އިތުރު ދެ ޑިޕްލޮމެޓަކަށް އަނިޔާވެ, ހޮސްޕިޓަލުގައި ފަރުވާ ދެމުންދާ ކަމަށްވެސް އެމްބަސީން ބުންޏެވެ

މި އެކްސިޑެންޓާ ބެހޭ ތަފްސީލެއް އަދި ނުލިބެ އެވެ.

ވިއްސަކަށް ގައުމުގެ ބައިވެރިވުމާއެކު ޣައްޒާ ސަމިޓު މާދަމާ ފަށާއިރު ޣައްޒާގައި ދެ އަހަރު ވަންދެން އިޒްރޭލުން ދިން ހަމަލާތައް މެދުކަނޑާލައި އިޒްރޭލުގެ އަސީރުންނާއި ފަލަސްތީނުގެ ގައިދީން މިނިވަންކުރަން ދަނީ ތައްޔާރުވަމުންނެވެ.