އާ އަހަރަށް ރައީސްގެ ދެކަނބަލުން ސިންގަޕޫރަށް 

ރައީސް ޑރ. މުހައްމަދު މުއިއްޒާއި އެ މަނިކުފާނުގެ އަނބިކަނބަލުން ސާޖިދާ މުހައްމަދު ނުރަސްމީ ދަތުރުފުޅެއްގައި ސިންގަޕޫރަށް ފުރާވަޑައިގެންފިއެވެ.

ރައީސްގެ ދެ ކަނބަލުން މިއަދު ސިންގަޕޫރަށް ފުރާވަޑައިގެންނެވިކަން ރައީސް އޮފީހުން ކަށަވަރުކޮށްދިން ނަމަވެސް، އެ ދަތުރުފުޅުގެ ތަފްސީލެއް ދީފައެއް ނުވެއެވެ.

ރައީސްކަމުގެ ހުވާކުރެއްވި ފަހުން ރައީސް އެންމެ ގިނައިން ވަޑައިގެންނެވި ގައުމަކީ ސިންގަޕޫރެވެ. އެގޮތުން އެ މަނިކުފާނު ވަނީ ހަތަރު ނުރަސްމީ ދަތުރުފުޅަކާއި އެއް ރަސްމީ ދަތުރުފުޅު ކުރައްވައިފައެވެ. އެއިން ކޮންމެ ދަތުރުފުޅެއްގައި ވެސް މެޑަމް ސާޖިދާ ބައިވެރިވެވަޑައިގަންނަވައެވެ.

މިއަހަރުގެ ތެރޭގައި ރައީސް ވަނީ ސިންގަޕޫރަށް ދެ ފަހަރެއްގެ މަތިން ވަޑައިގެންފައެވެ. އެއީ މިދިޔަ ޖޫން މަހުގެ 29 ގައި ކުރެއްވި ރަސްމީ ދަތުރުފުޅާއި މިދިޔަ ޖުލައި 31 ކުރެއްވި ނުރަސްމީ ދަތުރުފުޅެވެ.