ޑުރަގް އެތެރެކުރާ މީހުންނަށް މަރުގެ އަދަބު ދޭކަށް ބޭނުމެއް ނޫން، އުންމީދަކީ އެފަދަ އަމަލެއް ނުކުރުން: ރައީސް

ރާއްޖެއަށް ޑުރަގް އެތެރެކުރާ މީހުންނަށް މަރުގެ އަދަބު ދިނުމަށް ގާނޫނަށް އިސްލާހު ގެނައި ނަމަވެސް މަރުގެ އަދަބު ދިނުމަކީ އެ މަނިކުފާނު ކުރަން ބޭނުންވާ ކަމެއް ނޫން ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ރާއްޖެ އަށް ޑުރަގް އެތެރެކުރާ މީހުން ނުވަތަ އޭގެ ވިޔަފާރި ކުރުމުގެ ކުށް ސާބިތުވާ މީހުންނަށް މަރުގެ އަދަބު ދޭން ސުޕްރީމް ކޯޓުން މައްސަލަ ބަލާ ފަނޑިޔާރުން އިއްތިފާގުވާ ހާލަތުގައި އެ އަދަބު ކަނޑައެޅޭ ގޮތަށް މަސްތުވާތަކެއްޗާ ބެހޭ ގާނޫނަށް ގެނައި އިސްލާހު ރައްޔިތުންގެ މަޖިލިހުން ފާސްކުރީ ހުސްވި ޑިސެންބަރު މަހުގެ ތެރޭގަ އެވެ.

ވެރިކަންކުރާ ޕީއެންސީގެ އޮފީސް އިމާރާތް ހުޅުވައިދެއްވުމަށްފަހު ސަޕޯޓަރުންނާ ވާހަކަފުޅު ދައްކަވަމުން ރައީސް ވިދާޅުވީ، މަރުގެ އަދަބު ދިނުމަކީ އެ މަނިކުފާނު ކުރަން ބޭނުންވާ ކަމެއް ނޫން ކަމަށާއި ނަމަވެސް މި ގައުމުގައި އޮތް ޑުރަގުގެ ވަބާ ހައްލުކުރުމަށްޓަކައި ކުރަންޖެހިފައި އޮތް ކަމެއް ކަމަށެވެ.

”އަޅުގަނޑު އުންމީދު ކުރަނީ އަދި ޔަގީންކުރަނީ އެ އަދަބު ދޭން ޖެހޭނެ ހާލަތަށް އެއްވެސް ފަރާތެއް އަމަލު ނުހިންގާނެ ކަމަށް،“ ރައީސް ވިދާޅުވި އެވެ.