ގައުމީ ފުޓްސަލް ޓީމުން ހޯދި ކާމިޔާބީ ފާހަގަކުރުމަށް މާދަމާ ރޭ ހަވާއަރުވަނީ

ސާފް ފުޓްސަލް ޗެމްޕިއަންޝިޕްގެ ތަށި ރާއްޖެއިން ހޯދުމުން އެކަން ފާހަގަކުރުމަށް މާދަމާ ރޭ ހަވާ އަރުވަން ނިންމައިފި އެވެ.

ގައުމީ ޓީމު ރާއްޖެ އައުމަށް ހަމަޖެހިފައިވަނީ މާދަމާ ރެ އެވެ. ޓީމަށް މަރުހަބާ ކިއުމުގެ ގޮތުން މާދަމާ ރޭ ވެލާނާ އިންޓަނޭޝަނަލް އެއާޕޯޓާއި މާލޭގައިވެސް ހާއްސަ ހަރަކާތްތަކެއް ކުރިއަށް ގެންދަން ސަރުކާރުން ވަނީ ނިންމައިފަ އެވެ.

އެގޮތުން ވެލާނާ އިންޓަނޭޝަނަލް އެއާޕޯޓުގެ ވީއައިޕީން ކުޅުންތެރިންނަށް މަރުހަބާ ކިއުމަށްފަހު ކުޅުންތެރިން މާލެ އައިސް އަމީނީ މަގާއި މަޖީދީމަގުން ތައްޓާއެކު ޕިކަޕުގައި ދަތުރު ކުރުމަށް ވަނީ ހަމަޖެހިފަ އެވެ. ޕިކަޕު ބުރު ނިންމުމަށް ހަމަޖެހިފައިވަނީ އާޓިފިޝަލް ބީޗަށެވެ.

އާޓިފިޝަލް ބީޗުގައި ބޮޑުބެރުގެ ހަރަކާތްތައްވެސް އޮންނާނެ އެވެ. އަދި ގައުމީ ޓީމުގެ ކުޅުންތެރިންނާއެކު ފޮޓޯ ނެގުމާއި ޓްރޮފީ އާއެކު ފޮޓޯޯ ނެގުމުގެ ފުރުސަތުވެސް އާންމުންނަށް އޮންނާނެ އެވެ. އާޓިފިޝަލް ބީޗުގައި ޓީމަށް މަރުހަބާ ކިއުމުގެ ހާއްސަ ހަރަކާތްތައް ނިމިގެންދާނީ މާދަމާ ރޭ 10:00 ގައި ހަވާ އެރުވުމަށްފަހު އެވެ.

ސާފް ފުޓްސަލް ޗެމްޕިއަންޝިޕް ރާއްޖެއިން ކާމިޔާބުކުރީ ކުޅުނު ހުރިހާ މެޗެއް ކާމިޔާބުކޮށްގެންވެ. ގައުމީ ޓީމުގެ އެ ކާމިޔާބީއާ ގުޅިގެން ރައީސް ޑރ. މުހައްމަދު މުއިއްޒު ވަނީ ގައުމީ ޓީމުގެ ކުޅުންތެރިންނަށް އެއް މިލިއަން ރުފިޔާ ދޭން ނިންމަވައިފަ އެވެ.