ސާފް ފުޓްސަލް ޗެމްޕިއަންޝިޕް: ރާއްޖެއިން މުބާރާތް ނިންމާލީ ސަންތައިން ސައްތަ ރެކޯޑާއެކު

ތައިލެންޑްގެ ވެރިރަށް ބެންކޮކްގައި ކުރިއަށްދާ ސާފް ފުޓްސަލް ޗެމްޕިއަންޝިޕްގައި ރާއްޖޭން ކުޅުނު ފަހު މެޗުން ސްރީ ލަންކާ އަތުން 5-2 އިން ކާމިޔާބުކޮށްފި އެވެ. މި މޮޅާއެކު ރާއްޖެއިން މުބާރާތް ނިންމާލާފައި މިވަނީ ހުރިހާ މެޗަކުން މޮޅުވެ، ސައްތަ އިން ސައްތަ ރެކޯޑަކާ ޗެމްޕިއަންކަން ހޯދައިގެންނެވެ.

މުބާރާތުގައި ރާއްޖެއިން ކުޅުނު ފުރަތަމަ މެޗުގައި 7-1 އިން ޕާކިސްތާން ބަލިކުރިއިރު، ދެ ވަނަ މެޗުގައި ބަންގްލަދޭޝް ބަލިކުރީ 6-1 އިންނެވެ. ތިން ވަނަ މެޗުގައި އިންޑިއާ އަތުން 5-0 އިން މޮޅުވިއިރު، ހަތަރު ވަނަ މެޗުގައި ނޭޕާލް އަތުން މޮޅުވީ 2-1 އިންނެވެ. އަދި ބޫޓާން ބަލިކުރީ 1-3ގެ ނަތީޖާއަކުންނެވެ.

ރާއްޖެއިން މިއަދުގެ މެޗަށް ނުކުތްއިރުވެސް އޮތީ މުބާރާތުގެ ޗެމްޕިއަންކަން ޔަގީންކޮށްފަ އެވެ. ނަމަވެސް ދެ ކާޑު ހަމަވުމުގެ ސަބަބުން މިއަދުގެ މެޗަށް އަބްދުﷲ ޝާފިއު (ޝާއްޕެ) ހުރީ ސަސްޕެންޝަންގަ އެވެ. ޝާއްޕެގެ ބަދަލުގައި މިއަދު ކުޅެން ފުރަތަމަ ފަހަކުން ނުކުތީ އަބްދުﷲ ޖުނައިދު (ޖެންނޭ) އެވެ. އޭގެ އިތުރުން މިއަދުގެ މެޗުގައި ކީޕަރު ޒައިދާން އަހުމަދު (އަސޫ)ގެ ބަދަލުގައި ގޯލު ބެލެހެއްޓީ އިބްރާހިމް ނާޖިހު (ހޭޓް) އެވެ.

ހުއަމާކް އިންޑޯ ސްޓޭޑިއަމްގައި މިއަދު ކުޅުނު މެޗުގައި ފުރަތަމަ ގޯލު ޖެހީ ރާއްޖެއިންނެވެ. މެޗުގެ 12 ވަނަ މިނެޓުގައި ރާއްޖެއަށް ގޯލު ހުޅުވާލަ ދިނީ ކެޕްޓަން މުހައްމަދު އިމްރާން (އިންމި) އެވެ. ނަމަވެސް އޭގެ ފަސް މިނެޓު ފަހުން ލަންކާ އިން މެޗުގެ ނަތީޖާ އެއްވަރުކުރި އެވެ. މިއީ ރާއްޖެއަށް ހެދުނު ގޯހެއްގެ ފައިދާ ނަގައި، މުހައްމަދު ތިލްހަމް ކާމިޔާބު ކޮށްދިން ގޯލެކެވެ.

މެޗުގެ ފުރަތަމަ ހާފު ރާއްޖެއިން ނިންމާލީ ލީޑު ނަގައިގެންނެވެ. މި ގޯލަކީ ފުރަތަމަ ހާފު ނިމެން ސިކުންތު ކޮޅަކަށް ވެފައިވަނިކޮށް، އަހުމަދު ހަމީދު (އައްމަޑޭ) ދިން ބޯޅައަކުން ހުޒައިފަތު ރަޝީދު (ހުޒޭ) އެވެ.

މެޗުގައި ލަންކާ އިން ދެވަނަ ފަހަރަށް ނަތީޖާ އެއްވަރުކުރީ ދެ ވަނަ ހާފުގެ ހަ ވަނަ މިނެޓުގައެވެ. މިއީ އޭރިއާބޭރުން މަތީ ކަނަށް ބޯޅަ އަމާޒުކޮށްލައިގެން އަމާން މުހައްމަދު ފައިޒާ ކާމިޔާބު ކޮށްދިން ގޯލެކެވެ.

ރާއްޖޭން ނުވަ ވަނަ މިނިޓްގައި ލީޑުނެގީ އައްމަޑޭ ނެގި ބޯޅައެއް ހުއްޓުވަން އުޅުމުގެ ތެރޭގައި، އާކިބް އަތުން ބައިކޮޅަށް ވަން ގޯލުންނެވެ. އަދި، 14 ވަނަ މިނިޓްގައި، ހުސެއިން ސުހައިލް (ސޮކޭ) ވަނީ ރާއްޖޭގެ ހަތަރު ވަނަ ގޯލު ޖަހައިފަ އެވެ. ލިބުނު ފުރުސަތުގައި، ސޮކޭ ވަނީ ހަަމަޖެހިލައިގައި ގޯލަށް ބޯޅަ ފޮނުވާލައިފަ އެވެ.

މެޗުގެ 16 ވަނަ މިނިޓްގައި، އިންމި ވަނީ ރާއްޖޭގެ ފަސް ވަނަ ލަނޑު ޖަހައިފަ އެވެ. މިއީ، އަލީ ޝިޔާހު (ޝިޔަޅޭ) ދިން ބޯޅައަކުން އިންމި ޖެހި ލަނޑެކެވެ. މިއީ، މުބާރާތުގައި އެންމެ ގިނަ ގޯލު ޖެހި އިންމި ކާމިޔާބުކުރި ނުވަ ވަނަ ލަނޑެވެ.

ހާފުގެ މެދެއްހާ ހިސާބުން ރާއްޖޭގެ ކީޕަރު، ޒައިދާން ބޯޅައިގައި އަތްލުމުން ރެފްރީ ވަނީ އޭނާ އަށް ރަތް ކާޑެއް ދައްކައިފަ އެވެ.