ފުލުހުންގެ ވެހިކަލު މައްޗަށް އަރައި ހެދި ޓިކްޓޮކް ވީޑިއޯ އާންމުނުކުރުމަށް އަންގައިފި 

ފުލުހުންގެ ވެހިކަލެއް މައްޗަށް އަރައި ހެދި ޓިކްޓޮކް ވީޑިއޯ އާންމުނުކުރުމަށް އަންގައިފިއެވެ.

އެ ވީޑިއޯއާ ގުޅިގެން ގިނަ ބައެއްގެ ފާޑުކިޔުންތައް ވަނީ އަމާޒުކޮށްފައެވެ. އެގޮތުން ފުލުހުން އެކަމާ ބަހެއް ބުނެފައިނުވާތީ ވެސް ގިނަ ބަޔަކު ކަންބޮޑުވުން ފާޅުކޮށްފައިވެއެވެ.

އެކަމާ ގުޅޭގޮތުން ފުލުހުން މީޑިއާތަކަށް މިއަދު ފޮނުވި މެސެޖެއްގައި ބުނީ ސޯޝަލް މީޑިއާގައި މިހާރު ދައުރުވަމުންދާ ވީޑިއޯއިން ފެންނަނީ އުމުރުން 15 އަހަރުގެ ކުޑަކުއްޖެއް ކަމަށާއި އެ ވީޑިއޯއާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.

އެފަދަ ކޮންޓެންޓް، ކުއްޖާއަށް ފުރައްސާރަ ރައްދުވާ ގޮތަށް އާންމުކުރުމާއި، އަލުން ބްރޯޑްކާސްޓްކުރުމަކީ އެ ކުއްޖާއަށް ނަފްސާނީ ގޮތުންނާއި އިޖުތިމާއީ ގޮތުން ގެއްލުންތަކެއް ލިބި، ކުޑަކުދިންގެ ހައްގުތައް ރައްކާތެރިކުރުމަށް ކަނޑައަޅާފައިވާ އަހުލާގީ މިންގަނޑުތަކާ ހިލާފު ކަމެއް ކަމަށް ފުލުހުން ބުންޏެވެ.

”އެހެންކަމުން، އެއްވެސް މީޑިއާ އިދާރާއަކުން ނުވަތަ ސޯޝަލް މީޑިއާ ޕޭޖުތައް ހިންގަވާ ފަރާތްތަކުން މި ވީޑިއޯ އެއްވެސް ސިފައެއްގައި އަލުން ހިއްސާ ނުކުރުމަށާއި، މިހާރު ހިއްސާކޮށްފައިވާ ވީޑިއޯތައްވެސް އާންމުންނަށް ނުފެންނާނެހެން ނެގުމަށް ބާރުއަޅައި އިލްތިމާސްކުރަމެވެ..،“ ފުލުހުން ބުންޏެވެ.