ނިޕާ ވައިރަހުގެ ނުރައްކާ ރާއްޖެއަށް ކުޑަ، މިދަނީ ހާލަތު މޮނީޓާކުރަން: އެޗްޕީއޭ 

އިންޑިއާގެ ވެސްޓް ބެންގޯލް އިން ފެނުނު ނިޕާ ވައިރަހުގެ ނުރައްކާ އޮތް މިންވަރު ރާއްޖެއަށް ކުޑަ ކަމަށާއި ނަމަވެސް ހާލަތު މޮނީޓާ ކުރަމުންދާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން މިރޭ ނެރުނު ބަޔާނެއްގައި ބުނީ އެ ބައްޔާ ގުޅޭގޮތުން އެއްވެސް ކޭސްއެއް އަދި ކޮންޓެކްޓްވި ފަރާތެއްވެސް މިހާތަނަށް އެ އެޖެންސީއަށް ރިޕޯޓުކޮށްފައިނުވާ ކަމަށެވެ.

ވެސްޓް ބެންގޯލް އިން ނިޕާ ވައިރަހަށް ޕޮޒިޓިވް ތިން މީހަކު ފެނި، ކޮންޓެކްޓުވި 180 އަށްވުރެ ގިނަ މީހުން ދެނެގަނެވި، އެމީހުން މިހާރު ކަރަންޓީނު ކޮށްފައިވާ ކަމަށެވެ. އަދި ކަރަންޓީނު ކޮށްފައިވާ މީހުންގެ ހާލަތު އެ ގައުމުގެ ކަމާ ބެހޭ ފަރާތްތަކުން ވަރަށް ގާތުން ބަލަމުންދާ ކަމަށް އެޗްޕީއޭ އިން ބުންޏެވެ.

އެޗްޕީއޭ އިން ބުނީ އެ ބަލި ޖެހިގެން އިތުރު ކޭސްއެއް މިއަދާ ހަމައަށް ފެނިފައި ނުވާ ކަމަށާއި އެ ކޭސްތަކާ ގުޅިގެން އިންޑިއާގެ އިތުރު އެހެން އެއްވެސް ސަރަހައްދަކުން އަދި އެހެން ގައުމަކުން އެ ބަލި ފެނިފައިވާ ކަމުގެ ރިޕޯޓެއް ކޮއްފައި ނުވާ ކަމަށެވެ.

އެޗްޕީއޭ އިން ބުނީ މީގެ ކުރީ އަހަރުތަކުގައި ނިޕާ ވައިރަހުގެ ކޭސްތަކެއް އިންޑިއާ އަދި އެހެން ގައުމުތަކުންވެސް ރިޕޯޓުކޮށްފައިވާ ކަމަށެވެ.

އެ ބަލި ޖެހޭ ބައެއް މީހުންނަށް އެއްވެސް އަލާމާތެއް ނުފެނި ވެސް ހިނގައިދާނެ ކަމަށާއި އެ ބައްޔަށް ވަކި ހާއްސަ ފަރުވާއެއް ނެތް ނަމަވެސް، ބަލީގެ އަލާމާތްތަކަށް ފަރުވާ ކުރެވޭ ކަމަށް އެޗްޕީއޭ އިން ބުންޏެވެ.

މި ދުވަސްވަރު ވެސްޓް ބެންގޯލްއަށް ދަތުރުކުރާ ފަރާތްތަކުން ހާއްސަ ސަމާލުކަމެއް ދިނުމަށް ވެސް އެޗްޕީއޭ އިން ވަނީ އިލްތިމާސްކޮށްފައެވެ.

ވެސްޓް ބެންގާލުން އެ ވައިރަސް ޖެހިފައިވާ ފަސް މީހަކު ފެނުމާ ގުޅިގެން އޭޝިއާއަށް ނިސްބަތްވާ ތައިލެންޑް، ނޭޕާލް އަދި ޓައިވާން ފަދަ ގައުމުތަކުންނާއި ސަރަހައްދުތަކުން ވަނީ ރައްކާތެރިކަމުގެ ފިޔަވަޅުތައް އިތުރުކޮށްފައެވެ.

ނިޕާ ވައިރަހަކީ ޖަނަވާރުންގެ ފަރާތުން އިންސާނުންނަށް ފެތުރޭ ބައްޔެކެވެ. މިއީ މައިގަނޑު ގޮތެއްގައި ބަލިޖެހިފައިވާ އޫރާއި ވާލުގެ ފަރާތުން ފެތުރޭ ބައްޔެއް ނަމަވެސް، ބަލި ޖެހިފައިވާ މީހަކާ ގާތްކޮށް އުޅުމުގެ ތެރެއިން ވެސް އެ ބަލި އެކަކު އަނެކަކަށް ފެތުރިދާނެއެވެ.

ވެސްޓް ބެންގާލުގެ ހޮސްޕިޓަލަކުން އެ ވައިރަސް ފެނުމާ ގުޅިގެން، ގާތްގަނޑަކަށް 100 އެއްހާ މީހުން ވަނީ ކަރަންޓީނުކޮށްފައެވެ. އެންމެ ފުރަތަމަ އެ ބަލި ޖެހިފައިވާ ދެ ނަރުހުން ފެނުނު އިރު، އޭގެ ފަހުން ޑޮކްޓަރަކާއި ނަރުހެއްގެ އިތުރުން ހޮސްޕިޓަލުގެ އެހެން މުވައްޒަފަކު ވެސް ވަނީ އެ ބައްޔަށް ޕޮޒިޓިވްވެފައެވެ.

ދުނިޔޭގެ ސިއްހަތު ޖަމްއިއްޔާ، ޑަބްލިޔުއެޗްއޯ އިން ބުނާ ގޮތުގައި، ނިޕާ ވައިރަހަކީ ބަލިމަޑުކަމެއް ފެތުރިދާނެ ފަދަ ނުރައްކާތެރި ވައިރަހެކެވެ. އެ ބަލީގެ އަލާމާތްތަކުގެ ތެރޭގައި ހުން އައުން، ބޮލުގައި ރިހުން، މަސްތަކުގައި ރިހުން، ހޮޑުލެވުން އަދި ކަރުގައި ރިހުން ހިމެނެއެވެ. އޭގެ އިތުރުން ބޯ އެނބުރުމާއި، ނޭވާލާން އުނދަގޫވުން އަދި ސިކުނޑި ދުޅަވުން (encephalitis) ފަދަ ނުރައްކާތެރި ހާލަތްތައް ވެސް މެދުވެރިވެއެވެ.

ރިޕޯޓުތައް ބުނާގޮތުގައި، އެ ބަލީގައި މަރުވާ މީހުންގެ ނިސްބަތް 40 އިންސައްތަ އާއި 75 އިންސައްތައާ ދެމެދުގައި އުޅެއެވެ. މިހާތަނަށް ބަންގުލަދޭޝް، އިންޑިއާ، މެލޭޝިއާ، ފިލިޕީންސް އަދި ސިންގަޕޫރުން އެ ބަލި ފެނިފައިވާ އިރު، އެންމެ ގިނަ މީހުން މަރުވެފައިވަނީ ބަންގުލަދޭޝްއިންނެވެ. އޭގެ ތެރޭގައި 341 ކޭހަކުން 241 މީހުން މަރުވެފައިވާ ކަމަށް ރެކޯޑުތަކުން ދައްކައެވެ.