ބީއެމްއެލްއާ ހަވާލުކޮށްގެން ހަދާ ފްލެޓްތައް ރިޔާސީ އިންތިހާބަށް ނިންމައި ހަވާލުކުރަނީ

ބޭންކް އޮފް މޯލްޑިވްސް (ބީއެމްއެލް)އާ ހަވާލުކޮށްގެން ކުރިއަށްގެންދާ ސޯޝަލް ހައުސިން ޔުނިޓުގެ ތެރެއިން ބައެއް ފްލެޓުތަކުގެ އަމަލީ މަސައްކަތް 2028ގެ މެދުތެރޭގައި ނިންމުމަށް އަމާޒުކޮށްފައިވާ ކަމަށް ހައުންސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

ބީއެމްއެލްގެ އެފޯޑަބަލް ހޯމް ލީސިން ކުންފުނިން ހިންގާ އެފޯޑަބަލް ހައުސިންގެ ފަސް މަޝްރޫއެއްގެ އަމަލީ މަސައްކަތް އިއްޔެ ވަނީ ފަށައިފަ އެވެ. އެ މަޝްރޫއުތަކުގެ ތެރެއިން ތިން މަޝްރޫއެއް ހަވާލުކޮށްފައިވަނީ ދިވެހި ތިން ކުންފުންޏަކާ އެވެ.

އެއީ އަމީން ކޮންސްޓްރަކްޝަން، އެފްޑަބްލިޔު ކޮންސްޓްރަކްޝަން އަދި ރަޝީދު ކާޕެންޓްރީ އެންޑް ކޮންސްޓްރަކްޝަން އެވެ. އަނެއް ދެ ކުންފުންޏަކީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އަދި ޗައިނާ މެޝިނަރީ އިންޖީނިއަރިން ކޯޕަރޭޝަން (ސީސީސީ) އެވެ.

ފްލެޓްތަކުގެ އަމަލީ މަސައްކަތް ފެށުމަށް ހުޅުމާލޭގައި އިއްޔެ ބޭއްވި ރަސްމިއްޔާތުގައި ވާހަކަދައްކަވަމުން މުއްތަލިބް ވިދާޅުވީ ބީއެމްއެލްއާ ހަވާލުކުރި ހައުސިން މަޝްރޫއުތަކުގެ ތެރެއިން ހުޅުމާލެ ފޭސް އެކެއްގައި ހެދުމަށް ހަމަޖެހިފައިވާ 500 އަށްވުރެ ގިނަ ހައުސިން ޔުނިޓާއި ވިލިމާލޭގައި ހަދާ 300 ހައުސިން ޔުނިޓް ހަވާލުކޮށްފައިވަނީ ދިވެހި ތިން ކުންފުންޏާ ކަމަށެވެ.

އަދި ބީއެމްއެލްއާ ހަވާލުކޮށްގެން ހަދާ 3260 ހައުސިން ޔުނިޓުގެ މަސައްކަތް 2028 ވަނަ އަހަރުގެ މެދުތެރޭގައި ނިންމައި އެ ތަންތަން ލިބޭ ފަރާތްތަކާ ހަވާލުކުރެވިގެންދާނެ ކަމަށްވެސް ވިދާޅުވި އެވެ.

”އުންމީދަކީ ބީއެމްއެލާއި ސަރުކާރާއި ކުންފުނިތަކާ ގުޅިގެން މިކުރާ މަސައްކަތުގައި ކުރިއެރުންތަކެއް ލިބި ޓާގެޓާ އެއްގޮތަށް 2028ގެ މެދުތެރޭ މަޝްރޫއުތައް ނިމިގެންދިއުން. މި ޕްރޮޖެކްޓު ވާނީ ސަރުކާރުން މަސައްކަތް ފަށައި ނިންމައި ރައްޔިތުންނާ ހަވާލުކުރެވޭ ފުރަތަމަ ބޯހިޔާވަހިކަމުގެ މަޝްރޫއަށް،“ މުއްތަލިބު ވިދާޅުވި އެވެ.