ކުންފުންޏެއްގެ އެކައުންޓުން ފައިސާ ނެގި މައްސަލައިގައި އިތުރު ތިން މީހަކު ހައްޔަރަށް

މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބޭންކު އެކައުންޓުން ގިނަ އަދަދެއްގެ ފައިސާ ނަގާފައިވާ މައްސަލައެއްގައި އިތުރު ތިން މީހުން ހައްޔަރުކޮށްފިއެވެ.

އެ މައްސަލައާ ގުޅިގެން މިމަހު 26 ގައި ވެސް ވަނީ ދިހަ މީހަކު ހައްޔަރުކޮށްފައެވެ. އެހެންކަމުން މިހާރު އެ މައްސަލައިގައި ބަންދުގައި ތިބީ ޖުމުލަ 13 މީހެކެވެ.

އެ މައްސަލައިގައި ފަހުން ހައްޔަރުކުރި ތިން މީހުންނަކީ ސ. ހުޅުދޫ / ނާދީ، މުނާޒު ޖައުފަރު (24އ) އާއި ގދ. ގައްދޫ / އަތިރީއައްސޭރި، މުހައްމަދު ނާއިޝް ނަބީލް (24އ) އާއި ސ. ހިތަދޫ / ހާލަމް، ހަސަން ވިއާމް (19އ) އެވެ.

އެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން މުނާޒު 15 ދުވަހަށް، ނާއިޝް ނަބީލް ހަތް ދުވަހަށް އަދި ހަސަން ވިއާމް 10 ދުވަހަށް ބަންދުކުރުމަށް ވަނީ އަމުރުކޮށްފައެވެ.

އޭގެ އިތުރުން އެ މައްސަލައާ ގުޅިގެން ކުރިން ހައްޔަރުކުރި ގއ. ކަނޑުހުޅުދޫ / ފޫހިވާގެ، މުހައްމަދު އަލީ (42އ) ގެ ބަންދާމެދު ގޮތެއް ނިންމުމަށް ދެވަނަ ފަހަރަށް ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް ވަނީ އަމުރުކޮށްފައެވެ.

އެ މައްސަލައިގައި ފުރަތަމަ ހައްޔަރުކޮށްފައިވާ ދިހަ މީހުންނަކީ ލ. އިސްދޫ، ގުޑްލައިފް، މުހައްމަދު ހަސަން (59އ)، ސ. ހިތަދޫ، އުދަ، އަލީ އިރުފާނު އަހުމަދުދީދީ (26އ)، ސ. ހިތަދޫ، ނަންރީތިގެ، އަލީ ޝިރާޒު (38އ)، ހދ. ވައިކަރަދޫ، ޕެރިމްރޯޒް، އަބްދުﷲ ނާފިޒް (39އ)، ގއ. ކަނޑުހުޅުދޫ، ފޫހިވާގެ، މުހައްމަދު އަލީ (42އ)، މ. މާލޭގެއާގެ، މާލެ، މުހައްމަދު ނުހާދު އަލީ (30އ)، ހއ. ކެލާ، ޕެނަމާ، މުހައްމަދު ސިމާދު (38އ)، ގދ. ފިޔޯރީ، ހީނާމާގެ، އަލީ އިމްރާން (38އ) އަދި ގދ. ތިނަދޫ، ގުލްބަކާގެ، އަބްދުﷲ އިސްރާގް (19އ)، ކ. ހިންމަފުށި، މެޑޯޒް، މުޖައްމަދު އިބްރާހީމް (49އ) އެވެ.

ފުލުހުން ބުނީ މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބޭންކު އެކައުންޓުން 279،600 އަށްވުރެ ގިނަ ފައިސާ ނަގާފައިވާ ކަމަށެވެ.

އެ މައްސަލައިގައި ފުރަތަމަ ހައްޔަރުކުރި ދިހަ މީހުންގެ ތެރެއިން ހަ މީހުންނަކީ ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް ފައިސާ ނަގާފައިވާ މީހުން ކަމަށާއި އަދި އެތަނުން އެކަކު، ސްކޭމްކޮށްގެން ހޯދާފައިވާ ފައިސާ އެކި ވިޔަފާރިތަކަށް ޖަމާކޮށް އެ ފައިސާއަށް މުދާ ގަނެފައިވާކަމަށް ފުލުހުން ބުންޏެވެ.

އަނެއް ތިން މީހުންނަކީ އެކި މީހުން އޭޓީއެމްއަށް ގެންގޮސްގެން އެ މީހުން މެދުވެރިކޮށް އޭޓީއެމްއިން ފައިސާ ނެގުމަށްފަހު އެ ފައިސާތަކާ ހަވާލުވެފައިވާ މީހުން ކަމަށް ފުލުހުން ބުންޏެވެ.

ފުލުހުންގެ އެންޓި ސްކޭމް ސެންޓަރުން ދަނީ އެ މައްސަލަ ތަހުގީގު ކުރަމުންނެވެ.