ގިރާވަރުފަޅުން ގޯތި ލިބުނު ފަރާތްތަކަށް އަލުން ގުރު ނަގަން ފަށައިފި

ކުރީ ސަރުކާރުގެ ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބުނު ފަރާތްތަކަށް އަލުން ގުރު ނަގަން ފަށައިފިއެވެ.

ގިރާވަރުފަޅުން ގޯތި ލިބުނު ފަރާތްތަކަށް އާ ޕްލޮޓް އެލޮކޭޓް ކުރުން މިއަދު ހެނދުނު 9:30 އިން ފެށިގެން ސޯޝަލް ސެންޓަރުގައި ވަނީ ފަށައިފައެވެ.

ހައުސިން މިނިސްޓްރީން ބުނީ ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނެސްފައިވާތީ، އެތަނުން ގޯތި ލިބުނު ފަރާތްތަކަށް ކަނޑައަޅާފައިވާ ބިމުގެ ސަރަހައްދަށް ބަދަލު އައުމުން އަލުން އާ ލޮޓްތަކެއް މިހާރު ކަނޑައަޅާފައިވާ ކަމަށެވެ.

އެ ބަދަލާއެކު ގިރާވަރުފަޅުން ދޫކުރުމަށް ހަމަޖެހިފައިވަނީ 1250 އަކަފޫޓުގެ 2605 ގޯއްޗާއި، 1650 އަކަފޫޓުގެ 1213 ގޯއްޗާއި 2050 އަކަފޫޓުގެ 253 ގޯތި އަދި 2450 އަކަފޫޓުގެ އެއް ގޯއްޗެވެ.

ހައުސިން މިނިސްޓްރީން ބުނީ ގުރުނެގުމުގެ ކަންތައްތައް ކުރިއަށްގެންދާނީ އެ މިނިސްޓްރީގެ މުވައްޒަފުން ކަމަށާއި ގުރުއަތުލާ ހޯލަށް ވަދެވޭނީ ކޮންމެ ޕްލޮޓަކުންވެސް އެއް ފަރާތަށް ކަމަށެވެ. ގޯތި ލިބޭ ފަރާތެއްގެ ބަދަލުގައި އެހެން މީހަކު ފޮނުވާނަމަ އެކަން އަންގައިދޭ ލިޔުމާއި، ގޯތީގެ ވެރިފަރާތުގެ އައިޑީ ކާޑުގެ ކޮޕީއަކާއި ބަދަލުގައި ހާޒިރުވާ މީހާގެ އައިޑީކާޑުގެ ކޮޕީއެއް ބޭނުންވާނެ ކަމަށް މިނިސްޓްރީން ބުންޏެވެ.

ގުރުނެގުން ކުރިއަށްގެންދާ އިރު، ގޯތި ލިބޭ ފަރާތަށް ގުރުއަތުން ލިބޭ ޕްލޮޓް ހިޔާވެހި ޕޯޓަލުން ވަގުތުން ފެންނަން ހުންނާނެ ކަމަށާއި އޭގެ އިތުރުން އެސްއެމްއެސް މެދުވެރިކޮށްވެސް ޕްލޮޓް ނަމްބަރު އަންގާނެ ކަމަށް މިނިސްޓްރީން ބުންޏެވެ.

މިނިސްޓްރީން ބުނީ ގުރުއަތުލާ ނިމުމުން ގޯތިތަކުގެ ރަޖިސްޓްރީ އާއި ބިން ލިބޭ ފަރާތްތަކާއެކު ހަދާ އެއްބަސްވުންތަކާ ގުޅޭ މައުލޫމާތު ހިއްސާކުރާނެ ކަމަށާއި ބިން ހިއްކައި ނިމުމުން ގޯތިތައް ހަވާލުކުރާނެ ކަމަށެވެ.

ގިރާވަރުފަޅު ހިއްކުމުގެ މަސައްކަތް މެދުކެނޑިފައި އޮތުމަށްފަހު އެ މަސައްކަތް އިއްޔެ ވަނީ އަލުން ފަށައިފައެވެ.