ހިޔާގެ އަލިފާނާ ގުޅިގެން 85 ފަރާތަކަށް ވަގުތީ ބޯހިޔާވަހިކަން

ހިޔާ ޓަވަރުގައި ހިނގި އަލިފާނުގެ ހާދިސާއާ ގުޅިގެން 85 ފަރާތަކަށް ވަގުތީ ބޯހިޔާވަހިކަން ފޯރުކޮށްދީފިއެވެ.

ހުޅުމާލެ ފޭސް ދޭއްްގެ ހިޔާ ފުލެޓް އެޗް-5 ގައި އަލިފާނުގެ ހާދިސާއެއް ހިނގައިގެން، އިއްޔެ ވަނީ އެ ޓަވަރުން މީހުން ވެސް ހުސްކޮށްފައެވެ. އެ ޓަވަރުގައި އަލިފާން ރޯވީ ލިފްޓުގެ ވައިގޮޅިއެއްގައެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނީ އެ އަލިފާނުގެ ހާދިސާގައި ފަސްވަނަ ޓަވަރުގެ 38 އެޕާޓްމަންޓުގެ ނަރުދަމާ ހޮޅިތަކަށް ވަނީ ގެއްލުންވެފައި ކަމަށެވެ. އެގޮތުން މިހާތަނަށް އެހީތެރިކަން ބޭނުންވެގެން ރިޕޯޓުކޮށްފައިވާ 18 އެޕާޓްމަންޓުގައި ދިރިއުޅޭ 85 ފަރާތަކަށް ވަގުތީ ބޯހިޔާވަހިކަން ހަމަޖައްސައިދީ، ކެއުންބުއިމަށް އެހީ ފޯރުކޮށްދީފައިވާ ކަމަށް އެ އޮތޯރިޓީން ބުންޏެވެ.

އެ ހާދިސާއަށްފަހު ނަރުދަމާއަށް ލިބުނު ގެއްލުން ދެނެގަނެ، ގެއްލުންތައް މަރާމާތުކުރުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރަމުންދާ ކަމަށާއި އަދި އަލިފާނުގެ ހާދިސާއާ ގުޅިގެން އިތުރަށް ބަލަން ޖެހޭ ކަންކަން އެޗްޑީސީ އާއި އެ އޮތޯރިޓީން ބަލަމުންދާ ކަމަށް އެންޑީއެމްއޭ އިން ބުންޏެވެ.