ފުލުހުންގެ އިދާރާ ހިންގެވުން ފަރުހާދަށް

ޕޮލިސް ކޮމިޝަނަރު އިސްމާއިލް ނަވީން ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔާކުރެއްވުމުން، ފުލުހުންގެ އިދާރާ ވަގުތީ ގޮތުން ހިންގުން ޑެޕިއުޓީ ކޮމިޝަނަރު އޮފް ޕޮލިސް ފަރުހާދު ފިކުރީއާ ހޯމް މިނިސްޓަރު އަލީ އިހުސާން ހަވާލުކުރައްވައިފި އެވެ.

އިހުސާންއާ ހަވާލާދެއްވައި އެކަން ހާމަކުރެއްވީ ފުލުހުންގެ މީޑިއާ އިންނެވެ.

ފަރުހާދަކީ، ޕޮލިސް ކޮމިޝަނަރުގެ މަގާމުގައި ކުރިން ހުންނެވި އަލީ ޝުޖާއު މިދިޔަ އަހަރުގެ އޭޕްރިލް މަހު ކުއްލި ގޮތަކަށް ރިޓަޔާ ކުރެއްވުމުން ކޮމިޝަނަރު ކަމަށް ކުރިމަތިލެއްވި ތިން ބޭފުޅުންގެ ތެރެއިން އެއް ބޭފުޅެވެ. ދެން ކުރިމަތިލެއްވީ ނަވީން އާއި އެސިސްޓަންޓް ކޮމިޝަނަރު އަހުމަދު ޝަމީމު އެވެ.

ނަމަވެސް ރައީސް ޑރ. މުހައްމަދު މުއިއްޒު ނިންމެވީ ނަވީން އެ މަގާމަށް އައްޔަންކުރެއްވުމަށެވެ.

ފުލުހުންގެ ހިދުމަތުގައި 32 އަހަރު ހިދުމަތް ކުރެއްވުމަށްފަހު، އެ މުއައްސަސާއިން ނަވީން ރިޓަޔާ ކުރެއްވީ އިއްޔެ އެވެ. ނަވީން، ޕޮލިސް ކޮމިޝަނަރުގެ މަގާމަށް އައްޔަންކުރެއްވީ މިދިޔަ އަހަރުގެ ޖޫން މަހުގެ ތެރޭގައެވެ.