ވާދަވެރި ކެމްޕޭނަށްފަހު އެދެނީ ސުލްހަވެރިކަމާއެކު ކެމްޕޭން ނިންމާލަ ދިނުމަށް: ސޯލިހު

ރައްޔިތުންގެ މަޖިލީހުގެ އިންތިހާބުގެ ކެމްޕޭން ހަރާކާތްތައް ވާދަވެރިކަމާއެކު ކުރިއަށްގެންގޮސް ސުލްހަވެރިކަމާއެކު ނިންމާލުމަށް އެދިވަޑައިގަންނަވާކަމަށް އެމްޑީޕީގެ އެޑްވައިޒަރު، ކުރީގެ ރައީސް އިބްރާޙީމް މުހައްމަދު ސޯލިހު ވިދާޅުވެއްޖެއެވެ.

ފަސް ދުވަސް ފަހުން ބާއްވާ މަޖިލިސް އިންތިހާބުގެ ކެމްޕޭނަށް ޅ. ހިންނަވަރަށް މިއަދު ވަޑައިގެން ސޯލިހު ވިދާޅުވީ މަޖިލިސް އިންތިހާބުގެ ކެމްޕޭން ވާދަވެރި ކަމަށާއި ހުރިހާ ފަރާތްތަކަށްވެސް ދަންނަވާލަން ބޭނުންވަނީ އެއްވެސް ބަޔަކާ ދެކޮޅުނުވެ ސުލްހަވެރިކަމާއެކު ކެމްޕޭން ނިންމާލު ދިނުމަށް ކަމަށެވެ.

”އަޅުގަނޑު ވަރަށް އުފާވޭ ވާދަވެރި އިންތިހާބެއް ކުރިއަށްދާތީ. އެހެންނަމަވެސް އެއިންތިހާބު ކުރިއަށްދާންވާނީ، ހަމަގައިމުވެސް އެމްޑީޕީވެސް އަޅުގަނޑުމެން އެދެނީ ސުލްހަވެރިކަމާއި އެކީގައި. ހަމަޖެހުމާއި އެކީގައި. ވާދަވެރިކޮށްދިޔަ ނަމަވެސް އެއްބަޔަކު އަނެއްބަޔަކާއި ދޭތެރޭ ނަފްރަތެއް، ރުޅިވެރިކަމެއް ނެތި ރީތިކޮށް ގެންގޮސް މި އިންތިހާބުގެ ކެމްޕެއިން ނިންމާލަން“ ސޯލިހު ވިދާޅުވިއެވެ.

ކެމްޕޭން ކުރިއަށް ގެންދިޔުމަށް ދެން އޮތީ މަދު ދުވަސްކޮޅެއް ކަމަށާއި އެހެންކަމުން އެމްޑީޕީން ކުރަންވީ ކަމަކީ ފޯކަސް ގެއްލުވާނުލާ، ޕާޓީގެސިޔާސަތުތައް ރައްޔިތުންނަށް އަންގައި ދިނުމަށްކަމަށް ސޯލިހު ވިދާޅުވިއެވެ.