އިދިކޮޅު މައި ޕާޓީ, މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އިސް މަގާމުތަކެއް އުވާލައި, ބާރުތައް ޗެއާޕާސަނަށް ލިބޭ ގޮތަށް އެ ޕާޓީގެ އަސާސީ ގަވާއިދަށް ހުށަހެޅި ބޮޑެތި އިސްލާހުތައް ކޮންގްރެސް އިން މިއަދު ފާސްކޮށްފި އެވެ.
އަސާސީ ގަވާއިދަށް މި ބަދަލުތައް ގެނައުމަށް ހުށަހެޅުއްވީ, އެ ޕާޓީގެ ކުރީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލެވެ. އެ އިސްލާހުތަކަށް ކޮންގްރެސްގައި ބަހުސްކުރުމަށްފަހު އިސްލާހުތައް ފާސްކޮށްފައިވަނީ 546 މަންދޫބުންގެ ވޯޓުންނެވެ. އިސްލާހުތަކާ ދެކޮޅަށް 19 މަންދޫބަކު ވޯޓު ދެއްވި އެވެ.
މިއަދު ގެނައި އިސްލާހުތަކުގެ ތެރޭގައި ހިމެނޭ އެންމެ މުހިންމު އިސްލާހަކީ ޕާޓީގެ ރައީސް އާއި ނައިބް ރައީސްގެ މަގާމު އުވާލައި, ޕާޓީގެ އެންމެ އިސް ފަރާތަކީ ޕާޓީގެ ޗެއާޕާސަންއަށް ހެދުމެވެ. އެއާއެކު އެމްޑީޕީގެ ވެރިކަމުގައި އޮންނައިރު ރާއްޖޭގެ ރައީސަކީ އެންމެ އިސް ލީޑަރު ކަމަށް ބުނާ ބައި ވަނީ އުނިކޮށްފަ އެވެ.
އޭގެ އިތުރުން ޗެއާޕާސަންގެ ނައިބުންގެ އަދަދު ތިނަކަށް އިތުރުކުރަން ވެސް ވަނީ ފާސްކޮށްފަ އެވެ. އެގޮތުން ދެން އިންތިހާބު ކުރާނީ މާލީ ނައިބަކާއި އިދާރީ ނައިބެއްގެ އިތުރުން ސިޔާސީ ނައިބެކެވެ. އަދި އޭގެ ތެރެއިން އެކަކީ އަންހެނަކަށް ވާންޖެހޭނެ ކަމަށްވެސް ބުނެފައިވެ އެވެ.
އެމްޑީޕީގެ އަސާސީ ގަވާއިދަށް ގެނައި އަނެއް ބޮޑު ބަދަލަކީ ޕާޓީގެ އެތެރޭގެ އިންތިހާބުގައި ވޯޓުލުމަށްޓަކައި ވަކި މުއްދަތެއް ފުރިހަމަ ކުރަންޖެހޭ ގޮތަށް ހެދުމެވެ.
އެމްޑީޕީގެ ޕާލިމެންޓްރީ ގްރޫޕުގެ ލީޑަރު އިބްރާހިމް ނާޒިލް ހުށަހެޅުއްވި އެ އިސްލާހުގައި ބުނަނީ ތިން މަސް ދުވަސް ކުރިން ޕާޓީގެ މެމްބަރެއްގެ ގޮތުގައި ރަޖިސްޓްރީވެފައިވާ މީހުންނަށް ނޫނީ ޕާޓީގެ އެތެރޭގެ އިންތިހާބެއްގައި ވޯޓު ނުލެވޭނެ ކަމަށެވެ.
އެމްޑީޕީގެ އަސާސީ ގަވާއިދަށް ގެނައި އެހެން ބައެއް އިސްލާހުތައް:
- ކޮންގްރެސް އަށް ޑަބްލިޔުޑީސީގެ މެމްބަރުނާއި އަންހެނުންގެ ރޫހުގެ ހިންގާ ކޮމިޓީގެ މެމްބަރުން އިތުރުކުރުން
- ކޮންގްރެސް ޑެލިގޭޓުން ތައާރަފުކުރުން
އެމްޑީޕީގެ ކޮންގްރެސް އިން މިއަދު ފާސްކުރި އިސްލާހުތަކުގެ ތެރޭގައި އެމްޑީޕީގެ ރިޔާސީ ކެންޑިޑޭޓް, އަދި ރިޔާސީ އިންތިހާބު ކާމިޔާބުކޮށް އެމްޑީޕީގެ ސަރުކާރެއް އަންނަ ހާލަތުގައި ރައީސަކަށް ހުންނަ ޕާޓީގެ ބޭފުޅާ އަދާކުރައްވަންޖެހޭ މަސްއޫލިއްޔަތުތަކެއްވެސް ވަނީ ހިމަނައިފަ އެވެ.
އޭގެ ތެރޭގައި ޕާޓީގެ މެމްބަރަކު ރައީސުލްޖުމްހޫރިއްޔާގެ މަގާމަށް ހޮވިއްޖެ ނަމަ ސިޔާސަތުތައް ކަނޑައަޅާއިރު ގައުމީ މަޖިލީހުގެ މަޝްވަރާ ހޯދުން ލާޒިމުކުރުމާއި ރައީސުލްޖުމްހޫރިއްޔާގެ ހާއްސަ މުޝީރަކަށް ޗެއާޕާސަން އައްޔަންކުރުން މަޖުބޫރުވުން ހިމެނެ އެވެ.
