މާލޭގެ މޭޔަރު ކަމާ އާޒިމް ހަވާލުވެވަޑައިގެންފި

މާލޭ ސިޓީގެ މޭޔަރު ކަމުގެ ހުވާ ކުރައްވައި އާދަމް އާޒިމް މަގާމާ ހަވާލުވެވަޑައިގެންފިއެވެ.

މިރޭ ބޭއްވި ރަސްމިއްޔާތުގައި އާޒިމަށް ހުވާލައިދެއްވީ ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރެވެ. މާލޭގެ މޭޔަރު ކަމަށް އާޒިމް އިންތިހާބުވެވަޑައިގަތީ 7،621 މީހުންގެ ވޯޓުންނެވެ. ވޯޓުލީ މީހުންގެ ޖުމްލަ އަދަދަކީ 17،008 އެވެ. އާޒިމް އިންތިހާބު ކާމިޔާބު ކުރެއްވީ ފަސް ބޭފުޅަކާ ވާދަކުރައްވައެވެ.

މެދުހެންވޭރު ދާއިރާއަށް އެމްޑީޕީ ޓިކެޓްގައި އިންތިހާބުވި އަހްމަދު ރިޝްވާން މިއަދު ވަނީ ޕީއެންސީއަށް ސޮއިކުރައްވައި އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒާ ފޯމް ހަވާލުކުރައްވާފައެވެ.

ހެންވޭރު ދެކުނު ދާއިރާގެ ކައުންސިލަރަކަށް އިންތިހާބުވީ ޕީއެންސީގެ އާމިނަތު ރިޝްފާ އަހްމަދެވެ. މާފަންނު ދެކުނު ދާއިރާއަށް އިންތިހާބުވީ ޕީއެންސީގެ ހަސަން ނިޒާމެވެ.