ނޯތު ހާބަރުގައި އޮތް ބޯޓަކުން 10 ފުޅި ގޭސް ވަގަށް ނަގައިފި

ނޯތު ހާބަރުގައި އޮތް ބޯޓަކުން 10 ގޭސްފުޅި ވަގަށް ނަގައިފިއެވެ.

ފުލުހުން މިއަދު ބުނީ އެ ވައްކަމުގެ ރިޕޯޓު ލިބިފައިވަނީ މިއަދު 8:46 އެހާކަންހާއިރު ކަމަށެވެ. ބޯޓުން ވަގަށް ނަގައިފައިވަނީ 10 ލުއި ގޭސްފުޅި ކަމަށެވެ.

ގޭސްފުޅިތައް ވަގަށް ނެގި މައްސަލައިގައި އަދި މީހަކު ހައްޔަރުކޮށްފައިނުވާ ކަމަށް ފުލުހުން ބުންޏެވެ.

މީގެ އިތުރުން ފުލުހުން މިއަދު ބުނީ އަބަދަށްފެހި މަގުގައި ހުންނަ ފާމަސީއަކުން ވައްކަން ކޮށްފައިވާކަމުގެ ރިޕޯޓު 8:30 އެހާކަންހާއިރު ލިބިފައިވާ ކަމަށެވެ. އަދި އެ ހަމަ އެ މަގުގައި ހުންނަ ”ނިއު ލައިން“ ފިހާރައިން ވައްކަން ކުރި މައްސަލައެއް 7:54 އެހާކަންހާއިރު ރިޕޯޓު ކޮށްފައިވާ ކަމަށެވެ.

ފިހާރަތަކުން ވައްކަންކުރި މައްސަލަތައް ތަހުގީގު ކުރަމުންދާ ކަމަށާއި އަދި އެއްވެސް މީހަކު ހައްޔަރުކޮށްފައިނުވާ ކަމަށް ފުލުހުން ބުންޏެވެ.