ފެނަކަ ސައީދަށް ތުހުމަތު ކުރެވޭ ބޮޑު 6 މައްސަލައެއް އޭސީސީން ދަނީ ބަލަމުން

ފެނަކަ ކޯޕަރޭޝަން ލިމިޓެޑްގެ ކުރީގެ މެނޭޖިން ޑިރެކްޓަރު (އެމްޑީ) އަހުމަދު ސައީދު މުހައްމަދުގެ މައްޗަށް ތުހުމަތު ކުރެވޭ ބޮޑު ހަ މައްސަލައެއް ބަލަމުންގެންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.

އޭސީސީގެ ރައީސް އާދަމް ޝާމިލް އެކަން ހާމަކުރެއްވީ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމިޓީގެ މިއަދުގެ ބައްދަލުވުގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ. ނަމަވެސް އެ މައްސަލަތަކުގެ ތަފުސީލެއް ނުދެއްވަ އެވެ.

ޝާމިލް ވިދާޅުވީ، މިހާރު އޮތް ފެނަކަ ކޯޕަރޭޝަންގެ މެނޭޖުމަންޓުގެ ފަރާތުން އެ ކުންފުނީގެ ކުރީގެ މެނޭޖުމަންޓާ ގުޅޭ 25 މައްސަލައެއް އޭސީސީއަށް ހުށަހަޅާފައިވާ ކަމަށެވެ. އަދި އާދަޔާހިލާފަށް ފެނަކައިގެ މައްސަލަތައް ހުށަހަޅާފައިވާތީ އެ މައްސަލަތަކަށް ހާއްސަ ސަމާލުކަމެއް ދީގެން ބަލަމުން އަންނަ ކަމަށްވެސް ވިދާޅުވި އެވެ.