މާލޭގެ މަގުތަކަށް ދޫކޮށްލާފައި ހުރި ބާ ވެހިކަލްތައް އަނެއްކާވެސް ނަގަން ފަށައިފި

މާލޭގެ މަގުތަކަށް ދޫކޮށްލާފައި ހުރި ބާ އުޅަނދުތައް ނެގުމުގެ މަސައްކަތް މާލެ ސިޓީ ކައުންސިލުން ފަށައިފި އެވެ.

މާލޭގެ މަގުތައް ތަރުތީބުކޮށް، ރީތިކުރަން ކުރަމުން އަންނަ މަސައްކަތުގެ ދަށުން ވެހިކަލްތައް ނެގުމުގެ މަސައްކަތް ސިޓީ ކައުންސިލުން މިއަދު ފެށީ ފުލުހުންނާ ގުޅިގެންނެވެ.

މާލެ ސިޓީ ކައުންސިލުން ބުނީ، މާލޭގެ މަގުތަކަށް ދޫކޮށްލާފައި ހުރި އެތައް އަހަރެއްވީ އުޅަނދުތައް އެބަހުރި ކަމަށާއި އޭގެ ތެރެއިން ބައެއް ވެހިކަލްތަކުގެ އިންޖީނުވެސް ނެތް ކަމަށެވެ. އެ ހުރިހާ ވެހިކަލްތައް ޓޯ ކުރުމަށްފަހު، ނައްތައިލުމުގެ ކުރިން އިއުލާން ކުރާނެ ކަމަށްވެސް ބުންޏެވެ.

މާލެ އާއި ހުޅުމާލޭގެ މަގުތަކުގައި ބޭނުންނުކޮށް ގިނަ ދުވަސްވަންދެން ބަހައްޓާފައި ހުރި ވެހިކަލްތައް ޓޯކޮށް، ނައްތާލުމަށް ޓްރާންސްޕޯޓް މިނިސްޓްރީ އާއި ސިޓީ ކައުންސިލް އަދި ފުލުހުންނާއި ވެމްކޯ ގުޅިގެން މިދިޔަ ފެބްރުއަރީ މަހުވެސް ޕްރޮގްރާމެއް ހިންގި އެވެ. އެ ޕްރޮގްރާމުގެ ތެރެއިން 281 ވެހިކަލް ނައްތައިލި އެވެ.