ރާއްޖޭގެ ހިންގުމުގެ ނިޒާމު ބަދަލުކުރަން އެމްޑީޕީން މަސައްކަތް ކުރުމަށްޓަކައި, ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް ހުށަހެޅުއްވި ’ބޮޑު ބަދަލު‘ ކަރުދާހަށް އެ ޕާޓީގެ ކޮންގްރެސް އިން މިއަދު ރުހުން ދީފި އެވެ.
ރައްޔިތުންގެ މަޖިލީހުގެ ކުރީގެ މެމްބަރު އިލްޔާސް ލަބީބުގެ ތާއީދާއެކު ފައްޔާޒު ހުށަހެޅުއްވި މި ގަރާރު ކޮންގްރެސް އިން ފާސްވީ ކޮންގްރެސްއަށް ހާޒިރުވެ ތިއްބެވި 563 މަންދޫބުންގެ ތެރެއިން 520 މަންދޫބުންގެ ވޯޓާއެކު އެވެ.
ބޮދު ބަދަލުގެ ކަރުދާހުގައި ހިމެނޭ އެންމެ ބޮޑު ބަދަލަކީ ސަރުކާރުގެ އެންމެ އިސްވެރިޔާގެ މަގާމަށާއި ދައުލަތުގެ އެންމެ އިސްވެރިޔާގެ މަގާމަށް ތަފާތު ދެ މީހަކު އިންތިހާބު ކުރުމެވެ. އެގޮތުން ސަރުކާރުގެ އެންމެ އިސް ވެރިޔާއަކީ ރައްޔިތުންގެ އާންމު ވޯޓަކުން އިންތިހާބުކޮށް ރައްޔިތުންގެ މަޖިލީހުން ވަކިކުރާ މީހެއް ކަމަށާއި ދައުލަތުގެ އެންމެ އިސް ވެރިޔާއަކީ ހާއްސަ މަޖިލީހުން އައްޔަންކޮށް, އަދި ވަކިކުރާ މީހެއްކަމަށްވެސް ބޮޑު ބަދަލު ކަރުދާހުގައިވެ އެވެ.
ބޮޑު ބަދަލު ކަރުދާހުގައި ވަނީ, ދައުލަތުގެ ބައެއް ކަންކަން ނިންމުމާއި ގާނޫނުއަސާސީއަށް ގެންނާން ބޭނުންވާ ބައެއް ބަދަލު ގެނައުމާއި ދައުލަތުގެ ބައެއް މަގާމުތަކަށް މީހުން އައްޔަންކުރުމާއި ވަކިކުރުމަށް ރައްޔިތުންގެ މަޖިލީހުގެ މެންބަރުންގެ އިތުރުން ރައްޔިތުން އިންތިހާބުކުރާ ކައުންސިލަރުންވެސް ހިމެނޭ ގޮތުން ހާއްސަ މަޖިލީހެއް އުފަންކުރަންވެސް ހުށަހަޅައިފަ އެވެ.
ބޮޑު ބަދަލު ކަރުދާހުގައިވާ ގޮތުން ހާއްސަ މަޖިލީހަކީ އަވަސް އަވަހަށް ބައްދަލުވާ މަޖިލީހަކަށްވުމުގެ ބަދަލުގައި ހަމައެކަނި މަސައްކަތެއް ކުރަންޖެހިއްޖެ ހާލަތެއްގައި ބައްދަލުވާ, އުޖޫރައެއް ކަނޑައެޅިފައިނުވަ މަޖިލީހެކެވެ.
ބޮޑު ބަދަލު ކަރުދާހުގައި ދެން ހިމެނޭ މުހިންމު ކަންކަމުގެ ތެރޭގައި ސުޕްރީމް ކޯޓުގެ ފަނޑިޔާރުންނާއި މިނިވަން ކޮމިޝަންތަކުގެ މެންބަރުން ވަކިކުރަން ރައްޔިތުންގެ ރުހުން ހޯދަންޖެހޭ ގޮތަށް ބަދަލުކުރުމާއި ދައުލަތުގެ ކޮންމެ މަގާމަކަށް އިންތިހާބުކުރެވޭ ކޮންމެ މީހަކުވެސް އެ މީހަކު އިންތިހާބުކުރެވިފައިވާ ދައުރުގެ މެދުތެރެއިން ވަކިކުރުމުގެ ފުރުސަތު އިންތިހާބުކުރި ރައްޔިތުންނަށް ދިނުންވެސް ހިމެނެ އެވެ.
އޭގެ އިތުރުން ރައްޔިތުންގެ މަޖިލީހަކީ ކޮންމެ އަތޮޅަކުންނާއި ކޮންމެ ސިޓީއަކުން ވޯޓުދީގެން އިންތިހާބު ކުރެވޭ މެންބަރުންނަށް ހަދައި, މެންބަރުންގެ އަދަދު އިތުރުނުވާ ގޮތަށް ވަކި އަދަދެއްގައި ހިފެހެއްޓުމަށްވެސް ބޮޑު ބަދަލުގައި ހިމަނާފައިވެ އެވެ.
