އެމްޑަބްލިޔުއެސްސީ އިން ތަކަންދޫގެ ފެނާއި ނަރުދަމާ ނިޒާމު ގާއިމުކުރުމުގެ މަސައްކަތް ނިންމާލައިފި

ހއ. ތަކަންދޫގެ ފެނާއި ނަރުދަމާ ނިޒާމުގެ ގާއިމުކުރުމުގެ މަސައްކަތްތައް ނިންމައި ކޮމިޝަންކޮށްފި އެވެ.

މިއީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި 14 ޑިސެމްބަރު 2020 ގައި އެމްޑަބްލިޔުއެސްސީއާ ހަވާލުކުރި މަޝްރޫއެކެވެ. ޖުމުލަ 72 މިލިއަން ދިވެހި ރުފިޔާގެ މި މަޝްރޫއު އިފުތިތާހުކުރީ 2 ޑިސެމްބަރު 2021ގަ އެވެ.

އެ މަސައްކަތް ނިންމައި ކޮމިޝަންކުރުމުގެ މަސައްކަތް ކުރިއަށް ގެންދިޔައީ ކޮންސްޓްރަކްޝަން މިނިސްޓްރީ، ފެނަކަ އަދި އެމްޑަބްލިޔުއެސްސީގެ ބޭފުޅުން އެރަށަށް ވަޑައިގެންނެވެ.

އެމްޑަބްލިޔުއެސްސީ އިން ބުނީ، ތަކަންދޫގެ ފެނުގެ ނިޒާމު ގާއިމުކުރުމުގެ މަސައްކަތުގެ ދަށުން، ފެން ޕްލާންޓް ބެހެއްޓުމަށް އިމާރާތްކުރާ ފެސިލިޓީ ބިލްޑިން ގާއިމުކޮށް، ފެން ހޮޅީގެ މައިނެޓްވޯކް އަޅައި އަދި ގޭގެއަށް ފެނުގެ ކަނެކްޝަން ގުޅައިދީފައިވާ ކަމަށެވެ. އޭގެ އިތުރުން، ފެން އުފެއްދުމަށްޓަކައި ބޯހޯލް ތޮރުފައި، ރިޖެކްޓް ލައިން އަޅައި، ފެން ރައްކާކުރުމަށްޓަކައި ފެންތާނގީވެސް ބަހައްޓާފައިވާ ކަމަށް ބުންޏެވެ.

ތަކަންދޫގެ ނަރުދަމާ ނިޒާމު ގާއިމުކުރުމުގެ މަސައްކަތުގެ ދަށުން އެމްޑަބްލިޔުއެސްސީ އިން ވަނީ ނަރުދަމާގެ މައި ނެޓްވޯކްއާއި ޕަމްޕިން ލައިން އަޅައި، ޕަމްޕިން ސްޓޭޝަން ގާއިމުކޮށް އަދި ސީ އައުޓްފޯލް އަޅައިފަ އެވެ. އޭގެ އިތުރުން ގޭގޭގައި ޖަންކްޝަން ބަހައްޓައި، ނަރުދަމާގެ ކަނެކްޝަން ވަނީ ގުޅައިފަ އެވެ.

މި މަސައްކަތުގެ ދަށުން ފެން ތަހުލީލު ކުރުމަށް ބޭނުންވާ ސާމާނާއި ނަރުދަމާ ނިޒާމު ހިންގާ ބެލެހެއްޓުމަށް ބޭނުންވާ ވެހިކަލްވެސް ވަނީ ފޯރުކޮށްދީފަ އެވެ.