ރާއްޖެއިން މޫސުމީ ބަދަލުތަކާ ދެކޮޅަށްކުރަމުންދާ މަސައްކަތަށާއި ކާބޯތަކެތީގެ ރައްކާތެރިކަން ކަށަވަރުކުރުމަށް ކުރަމުންދާ މަސައްކަތައް އެހީތެރިވުމުގެ ގޮތުން އޭޝިއަން ޑިވެލޮޕްމެންޓް ބޭންކް (އޭޑީބީ)ން 21 މިލިއަން ޑޮލަރު ދޭން ނިންމައިފި އެވެ.
އޭޑީބީން މިއަދު އާންމުކުރި ލިޔުމެއްގައި ބުނީ ރާއްޖެއަށް އެހީތެރިވުމުގެ ގޮތުން ދިނުމަށް ނިންމައިފައިވާ 21 މިލިއަން ޑޮލަރުގެ ތެރެއިގައި ހިމެނެނީ ހަތަރު މިލިއަން ޑޮލަރުގެ ލުއި ލޯނަކާއި އެންމެ ފަގީރު އަދި ތަރައްގީވަމުން އަންނަ ގައުމުތަކަށް އެ ބޭންކުން ދޭ 17.95 މިލިއަން ޑޮލަރުގެ ހިލޭ އެހީ ކަމަށެވެ.
އޭޑީބީގެ އިކޮނަމިސްޓް މިޗިކޯ ކަޓަގަމި ވިދާޅުވީ، ރާއްޖޭގެ ރަށްތަށް ހުންނަނީ ކަނޑުގެ ސަތަހައިގެ އެންމެ މީޓަރެއް އުހުގައި ކަމަށްވުމުން ރާއްޖެއަކީ މުސުމީ ބަދަލުތަކުގެ ސަބަބުން ވަރަށް ބޮޑު ގެއްލުމެއް ލިބޭނެ ގައުމެއް ކަމަށެވެ.
އޭނާ ވިދާޅުވީ މޫސުމީ ބަދަލުތަކުގެ ސަބަބުން ދިމާވާ ކަންކަމުގެ ސަބަބުން ރާއްޖޭގެ ކާބޯތަކެތީގެ ރައްކާތެރިކަން ވަރަށް ނާޒުކު ހަލަތަކަށް ހިނގައިދިޔުމުގެ ފުރުސަތު ވެސް އެބައޮތް ކަމަށެވެ.
ރާއްޖެއަށް ދިނުމަށް ނިންމައިފައިވާ 21 މިލިއަން ޑޮލަރުގެ އެހީގެ ދަށުން އައްޑޫ ސިޓީއާއި މާލޭގައި ހުރި އާލީ ވާނިން ސިސްޓަމްތައް އަޕްގްރޭޑްކުރަން ނިންމައިފައިވާ ކަމަށް އޭޑީބީން ބުންޏެވެ. އެ ސިސްޓަމްތައް ގާއިމިކުރުމުން ވަގުތުން މޫސުމާއި އާލީ ވާނިން ސިސްޓަމްތައް މޮނިޓާކުރެވޭނެ ކަމަށް އޭޑީބީން ބުންޏެވެ.
އަދި ކުޅުދުއްފުށި ސިޓީގައި ފެން ބޮޑުވުން ހައްލުކުރަން ފެން ހިންދާ ނިޒާމާއި ފިލްޓަރޭޝަން ނިޒާމެއް ވެސް އެ ފައިސާއިން ގާއިމުކުރާނެ ކަމަށް އޭޑީބީން ބުންޏެވެ. ކުޅުދުއްފުށީގެ ކަނޑޫފާ ސަރަހައްދު އަލުން އާލާކޮށް، ގުދުރަތީ ވެށި ވެސް ހިމާޔަތްކުރާނެ ކަމަށެވެ.
މީގެ އިތުރުން އައްޑޫއާއި ހއ. އަތޮޅުގައި ކްލައިމެޓް ސްމާޓް އާބަން ފާމިން ޓެކްނޮލޮޖީ ތައާރަފުކޮށް ހދ. ހަނިމާދޫ އެގްރިކަލްޗާ ސެންޓަރުގައި ދިރާސާ ކުރެވޭނެ މަލްޓިޕާޕަސް ފެލިޓީއެއް ބިނާކުރާނެ ކަމަށް އޭޑީބީން ބުންޏެވެ.
ގުޅުންހުރި
ރާއްޖޭގެ ދަނޑުވެރިކަމުގެ ސިޔާސަތަށް އޭޑީބީން ތައުރީފު ކޮށްފި