އެސްޓީއޯ އިން ބިނާކުރި އެލައިޑް، މާކެޓުގައި މިއަދު އެންމެ ބޮޑު ހިއްސާ އޮތް ކުންފުނި

މީގެ 39 އަހަރު ކުރިން، 1985 ގައި އިނގިރޭސި ވިލާތުގެ ކޮމާޝަލް ޔޫނިއަން އަޝުއަރެންސް ކުންފުންޏާއި ސަރުކާރުގެ މައި ވިޔަފާރި ކުންފުނި، އެސްޓީއޯއާ ދެމެދު ހެދި ޖޮއިންޓް ވެންޗާގެ ދަށުން އުފަންވި އެލައިޑް އިންޝުއަރެންސްއަކީ އެސްޓީއޯގެ ކާމިޔާބު ވާހަކައެކެވެ. އެސްޓީއޯ އިން މުޅިން އަލަށް ރާއްޖެއަށް ތައާރަފުކޮށް ދިރުވި އެލައިޑަކީ ދިވެހިންގެ މެދުގައި މިއަދު އެންމެ މަގުބޫލު އިންޝުއަރެންސް ކުންފުންޏެވެ. ރާއްޖޭގެ ވިޔަފާރީގެ ދާއިރާއިން އެންމެ ކާމިޔާބު އެއް ކުންފުންޏެވެ.

ކުންފުނި އުފެއްދިތާ ދެ އަހަރު ތެރޭ، 1987 ވަނަ އަހަރުގެ ކުރީކޮޅު ކޮމާޝަލް ޔޫނިއަން އަޝުއަރެންސް ކުންފުނީގެ ހިއްސާ އެސްޓީއޯ އިން ގަން ހިސާބުން މިއަދާ ހަމައަށް އެލައިޑް ހިންގަމުން އަންނަނީ ސައްތައިން ސައްތަ ދިވެހި ކުންފުންޏެއްގެ ގޮތުގައެވެ.

އެލައިޑްގެ ތާރީހަށް ޖެހިލާއިރު، އެ ކުންފުނީގެ އެންމެ ފުރަތަމަ، ބޮޑު ކާގޯ ކްލެއިމަކީ 1988 ވަނަ އަހަރު ނޮވެމްބަރު 3ގެ ހާދިސާގައި ”ޕްރޮގްރެސް ލައިޓް“ ހައިޖެކް ކުރުމާއި ގުޅިގެން ގެއްލުނު ކާގޯއާ ގުޅިގެން ކުރެވުނު ކްލެއިމްއެވެ. އަދި އޭގެ ހަތަރު އަހަރު ފަހުން، 1992 އަހަރުގައި އިންޑިއާގެ ޖޭ.ބީ ބޯޑާ ގުރޫޕާއެކު އަލަށް ރިއިންޝުއަރެންސް އެއްބަސްވުމެއްގައި އެލައިޑުން ސޮއިކުރިއެވެ. އަދި ހަމަ އެ އަހަރު ފިހާޅޮހި އައިލެންޑް ރިސޯޓުގައި ހިނގި އަލިފާނުގެ ހާދިސާއާ ގުޅިގެން ކުރި ކްލެއިމަކީ އެލައިޑުގެ އެންމެ ފުރަތަމަ ބޮޑު ފަޔާ ކްލެއިމްއެވެ.

އެލައިޑަކީ އެ ކުންފުނީގެ ވަރަށް ކުރީކޮޅު، 1993 ގައި ފުރަތަމަ ފަހަރަށް ޓްރޭނިން ސްޓްރެޓަޖީ ތައްޔާރުކޮށް ތަންފީޒުކުރި ކުންފުންޏެކެވެ. އެކަމުގެ ނަތީޖާއަކަށްވީ ރާއްޖޭގައި ތިބި ފުންނާބުއުސް އިންޝުއަރެންސް ތަޖުރިބާކާރުން ތަމުރީނުވެގެން ދިއުމެވެ.

2000 އިން ފެށިގެން އެލައިޑުން ހޯދާފައިވާ އަވަސް އަދި ގިނަ ކާމިޔާބީތައް:

• 2003 ވަނަ އަހަރު ރާއްޖޭގައި އަލަށް ހެލްތް އިންޝުއަރެންސް ތައާރަފުކުރި.
• 2004 ވަނަ އަހަރު ކުރިމަތިވި ސުނާމީގެ ކާރިސާއާ ގުޅިގެން ކްލެއިމްގެ ގޮތުގައި 22 މިލިއަން ޑޮލަރު އެކި ފަރާތްތަކަށް ދެއްކި
• 2007 ވަނަ އަހަރު އައިޖީއެމްއެޗް އަދި އޭޑީކޭ އިން ހޯދާ ފަރުވާތަކަށް ކޭޝްލެސްގެ ހިދުމަތް ފޯރުކޮށްދޭން ފެށި
• 2008 ވަނަ އަހަރު ރާއްޖޭގައި އަލަށް ލައިފް އިންޝުއަރެންސްގެ ހިދުމަތް ފެށި
• 2008 ވަނަ އަހަރު އައްޑޫގައި ބްރާންޗު އޮފީހެއް ހުޅުވައި ރާއްޖޭގައި އަލަށް މާލެ ފިޔަވައި އެހެން ރަށަކުން އިންޝުއަރެންސްގެ ޚިދުމަތް ލިބޭނެ ގޮތް ހެދި
• 2008 ވަނަ އަހަރު 24 ގަޑިއިރު އޮޕަރޭޓް ކުރާ ކޯލްސެންޓަރެއްވެސް އެލައިޑުން ގާއިމުކުރި
• 2009 ވަނަ އަހަރު އެލައިޑް ހެލްތް އިންޝުއަރެންސްގެ ދަށުން އައުޓްޕޭޝަންޓަށް ކޭޝްލެސްގެ ހިދުމަތް ތައާރަފުކުރި
• 2012 ވަނަ އަހަރު އާސަންދަ އުފައްދައި 2015 ވަނަ އަހަރާ ހަމައަށް އެލައިޑުން އާސަންދައިގެ ހިދުމަތް ފޯރުކޮށްދިން
• 2014 ވަނަ އަހަރު އަޔާދީ ތަކަފުލް ތައާރަފުކޮށް އެލައިޑުން ތަކަފުލްގެ ހިދުމަތް ދޭން ފެށި
• 2015 ވަނަ އަހަރު ބޭންކު އޮފް މޯލްޑިވްސްއާ ގުޅިގެން ބޭންކުއަޝުއަރެންސްގެ ހިދުމަތް ފެށި. މީގެ ސަބަބުން ރާއްޖޭގެ އެކި ހިސާބުތަކުގައި ހުރި ބޭންކުތައް މެދުވެރިކޮށް އިންޝުއަރެންސްގެ ހިދުމަތް ހޯދޭނެ މަގު ފަހިވެގެން ދިޔަ
• 2016ވަނަ އަހަރު ރާއްޖޭގައި މުޅިން އަލަށް ޝަރީއާ ކޮމްޕްލަޔަންޓް ލައިފް އިންޝުއަރެންސްއެއް، ފެމިލީ ތަކަފުލްގެ ނަމުގައި ތައާރަފު ކުރި. އަދި ހަމަ އެ އަހަރު އެލައިޑުގެ މޯބައިލް އެޕް ތައާރަފުކުރި
• 2018 ވަނަ އަހަރު އެލައިޑުގެ ކަސްޓަމާ ޕޯޓަލް ”މައި އެލައިޑު“ ތައާރަފު ކުރި. ހަމަ އެއާއެކު އޭއައި އިންޝުއަރެންސް ބޮޓް އެޖެންޓް 1600 ތައާރަފު ކުރި
• 2020 ވަނަ އަހަރުން ފެށިގެން ކޮވިޑު19 އާ ގުޅިގެން ރާއްޖެއަށް ޒިޔާރަތްކުރާ ފަތުރުވެރިންނަށް އެލައިޑު އިންބައުންޑްގެ ނަމުގައި ކޮވިޑް ކަވާ ދޫކުރި
• 2023 ވަނަ އަހަރު އަޔާދީ ތަކަފުލްއިން ރާއްޖޭގައި އަލަށް ދަނޑުވެރިންނަށް ހާއްސަކޮށްގެން ކްރޮޕް ތަކަފުލް ތައާރަފު ކުރި

އެލައިޑުގެ މިހާރުގެ ހާލަތާއި މާކެޓްގެ ޑޮމިނޭޝަން:

އެލައިޑަށް މި އަހަރު 39 އަހަރު ފުރިފައިވާއިރު، މިއަދު ރާއްޖޭގައި އެ ކުންފުންޏާ ވާދަކުރާނެ ކުންފުނިތަކެއް ވުޖޫދުވެއްޖެ އެވެ. ސިލިންކޯ އިންޝުއަރެންސް، އަމާނާ ތަކަފުލް، ސޮލަރެލް އިންޝުއަރެންސް އަދި ދިވެހި އިންޝުއަރެންސް އަކީ ބައެއް ނަންތަކެވެ. ނަމަވެސް މާކެޓް ޑޮމިނޭޓް ކުރަނީ އަދިވެސް އެލައިޑެވެ. މި އަހަރުގެ ފުރަތަމަ ކުއާޓާގެ މާކެޓު އެނަލިސިސްއަށް ބަލާއިރު އެލައިޑްގެ ގްރޮސް ރިޓެން ޕްރިމިއަމްއަކީ މާކެޓުގެ 44 ޕަސެންޓެވެ.

ޕްރޮފިޓެބިލިޓީ މާކެޓުގެ 38 މާކެޓުގައި ހުރި އިރު، ރިއިންޝުއަރެންސް ޕްރިމިއަމްއަކީ މާކެޓުގެ 39 ޕަސެންޓެވެ. އަދި ރިއިންޝުއަރެންސް ކޮމިޝަންގައި އެލައިޑުން މާކެޓުގެ 40 ޕަސެންޓް ހިއްސާކުރާއިރު، ނެޓް އިންކަޑް ކްލެއިމްސްއަކީ މާކެޓުގެ 44 ޕަސެންޓެވެ.