ފުވައްމުލަކު ބޭރުން ޑިންގީއެއްގައި ތިބި ސޯމާލިއާގެ ތިން މީހުން ފެނިއްޖެ

ފުވައްމުލައް ސިޓީގެ ބޭރުން ކަނޑުމަތީގައި އޮތް ޑިންގީއަކުން ސޯމާލިއާގެ ބަޔަކު ފެނިއްޖެ އެވެ.

އެމްއެންޑީއެފުން މިއަދު ބުނީ ފެނިފައިވަނީ ސޯމާލިއާގެ ތިން މީހަކު ކަމަށެވެ. އެ މީހުން ފެނުނީ ފުވައްމުލަކު ހުޅަނގު އުތުރުން 10 ވަރަކަށް މޭލު ބޭރުން ކަމަށް އެމްއެންޑީއެފްއިން ބުނެ އެވެ.

”އެ ސަރަހައްދަށް ގޮސް ބެލިބެލުމުން އެނގުނު ގޮތުގައި މިއީ ރާއްޖެއިން ބޭރުގެ ސޯމާލިއާގެ މީހުން ބޭނުންކުރާ ވައްތަރުގެ ސްކިފްއެއް. މި ޑިންގީގައި ސޯމާލިއާ މީހުން ކަމަށް ޝައްކު ކުރެވޭ ތިން މީހުން ތިބި,“ އެމްއެންޑީއެފްއިން ބުނެފައިވެ އެވެ.

މިވަގުތު އެ މީހުން ތިބީ ފުވައްމުލަކުގެ ބަނދަރުގައި އެމްއެންޑީއެފްގެ ބެލުމުގެ ދަށުގަ އެވެ. އެ ތަނުގައި ފުލުހުން ހަރަކާތްތެރިވަމުންދާ ކަމަށް އެންއެންޑީއެފުން ބުންޏެވެ.