ހައުސިން މިނިސްޓްރީ އުވާލުމުން ބައެއް މުވައްޒަފުން ދޫކޮށްލަން ޖެހިދާނެކަން އަންގައިފި

މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް އުވާލުމާ ގުޅިގެން އެ މިނިސްޓްރީގައި މަސައްކަތް ކުރަމުން އައި ބައެއް މުވައްޒަފުން ދޫކޮށްލަން ޖެހިދާނެކަން އަންގައިފި އެވެ.

ހައުސިން މިނިސްޓްރީ އުވާލުމަށްފަހު ވަނީ މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާއަށް ބަދަލުކޮށްފަ އެވެ. އެއާ އެކު ހައުސިން މިނިސްޓްރީގައި މަސައްކަތް ކުރަމުން އައި މުވައްޒަފުން ވަނީ ކޮންސްޓްރަކްޝަން މިނިސްޓްރީގެ ދަށަށް ބަދަލުކޮށްފަ އެވެ.

ސިވިލް ސާވިސް ކޮމިޝަން (ސީއެސްސީ)ން އެ މުވައްޒަފުންނަށް ފޮނުވި މެއިލްއެއްގައި ބުނީ ހައުސިން މިނިސްޓްރީގެ މަސައްކަތުގެ ތެރެއިން ފިނޭންސް މިނިސްޓްރީ އާއި ކޮންސްޓްރަކްޝަން މިނިސްޓްރީއަށް ބަދަލުކޮށްފައިވާ މަސައްކަތްތައް ކުރާނެ މުވައްޒަފުން ބަދަލުކުރުމުގެ މަސައްކަތް ފަށައިފައިވާ ކަމަށެވެ. އަދި މިނިސްޓްރީތަކުގެ އިދާރީ ހިންގުމަށް ގެނައި ބަދަލާ ގުޅިގެން އެ މިނިސްޓްރީތަކުގެ އިދާރީ އޮނިގަނޑު މުރާޖައާ ކުރުމުގެ މަސައްކަތް ވެސް ކުރަމުން އަންނަ ކަމަށް ސީއެސްސީން ބުންޏެވެ.

ސީއެސްސީން ބުނ އެއްވަނަ ނަމްބަރުގެ ދަށުން ބަދަލުކުރެވޭ މުވައްޒަފުންގެ ތެރެއިން އެ މިނިސްޓްރީތަކަށް ދާއިމީ ވަޒީފާ ހަމަޖެއްސޭނީ އިދާރީ އޮނިގަނޑު ރިވިއުކުރުމަށް ފަހު އެ އޮނިގަނޑުގައިވާ މަގާމުތަކުގެ އަދަދުން ކަމަށެވެ. އަދި އެ ހާލަތުގައި މަގާމަށް ވުރެ މުވައްޒަފުންގެ އަދަދު އިތުރުވާ ނަމަ، ވަޒީފާ ހަމަޖައްސާނެ ފަރާތް ކަނޑައަޅާނީ ދިވެހި ސިވިލް ސާވިސް ގަވައިދުގެ 225 ވަނަ މާއްދާގެ (ނ) ގެ ދަށުން މެރިޓް އުސޫލުން ކަމަށް ވެސް އެ މެއިލްގައިވެ އެވެ.

ހައުސިން މިނިސްޓްރީގެ ކޯޕަރޭޓް ޑިޕާޓްމަންޓްގެ މަސައްކަތަކީ އެ ގެނެވުނު ބަދަލުގެ ދަށުން ވަކި މިނިސްޓްރީއަކަށް ބަދަލުކުރެވިފައިވާ މަސައްކަތްތަކަށް ނުވާތީ އެ ޑިޕާޓްމަންޓުގައި ތިބި މުވައްޒަފުން، ބަދަލުނުކުރެވޭނެ ކަމަށް ސީއެސްސީން ބުންޏެވެ.

އެ މުވައްޒަފުންނަށް ”ސިވިލް ސާވިސް މުވައްޒަފުން ވަޒީފާއިން ދޫކޮށްލުމުގައި އަމަލުކުރާނެގޮތުގެ އުސޫލު“ ގެ ދަށުން އެކަށޭނެ އެހެން ވަޒީފާއެއް ހޯދައި ދިނުމުގެ މަސައްކަތް މިނިސްޓްރީތަކާ ގުޅިގެން ކުރިއަށް ގެންދާނެ ކަމަށް ސީއެސްސީން ބުންޏެވެ.

”މިފަދައިން ފުރުސަތު ހޯދައި ނުދެވިއްޖެ ހާލަތެއްގައި ”ސިވިލް ސާވިސް މުވައްޒަފުން ވަޒީފާއިން ދޫކޮށްލުމުގައި އާމަލުކުރާނެގޮތުގެ އުސޫލު“ ގެ ދަށުން އެ މުވައްޒަފުން ވަޒީފާއިން ދޫކޮށްލެވޭނެކަން،“ ސީއެސްސީން ބުންޏެވެ.

ސީއެސްސީން ބުނީ ހައުސިން މިނިސްޓްރީގެ ކޮންޓްރެކްޓް ވަޒީފާތަކުގައި ތިބި މުވައްޒަފުން އެ ކޮމިޝަނުގެ ގަވައިދުގެ 222 ވަނަ މާއްދާގެ ދަށުން އެ މުވައްޒަފުންނާ އެކު ހެދިފައިވާ އެއްބަސްވުމާ އެއްގޮތަށް ނޯޓިސްދީ ދޫކޮށްލާނެ ކަމަށެވެ.