އުރުދުގާންގެ އެންމެ ބޮޑު ސިޔާސީ ވާދަވެރިޔާ ހައްޔަރުކޮށްފި

ތުރުކީގެ ރައީސް ރަޖަބް ތައްޔިބު އުރުދުގާންގެ އެންމެ ބޮޑު ސިޔާސީ ވާދަވެރިޔާ އެކްރެމް އިމަމޮގުލޫ ހައްޔަރުކޮށްފި އެވެ.

ތުރުކީގެ އެންމެ ދުވަސްވީ އަދި ސަރުކާރާ އިދިކޮޅު ރިޕަބްލިކަން ޕީޕަލްސް ޕާޓީ (ސީއެޗްޕީ) އަށް ނިސްބަތްވާ އަދި އިސްތަންބުލްގެ މޭޔަރުގެ މަގާމުގައި ހުންނެވި އިމަމޮގުލޫ ހައްޔަރުކޮށްފައި މިވަނީ ކުރިއަށް އޮތް ރިޔާސީ އިންތިހާބުގައި ވާދަކުރުމަށް އޭނާއަށް ޓިކެޓު ދޭން ނިންމާފައި ވަނިކޮށެވެ.

ކޮރަޕްޝަނާއި ޓެރަރިސްޓް ގްރޫޕްތަކާ ގުޅުން ހުރި ކަމަށް ތުހުމަތުކުރެވޭ 100 އެއްހާ ސިޔާސީ މީހުންނާއި ވިޔަފާރިވެރިންނާއި މުނިސިޕަލް އޮފިޝަލުން ހައްޔަރުކުރުމަށް ހިންގި ރެއިޑެއްގައި އިމަމޮގުލޫ ހައްޔަރުކުރި އިރު، ތުރުކީ ސަރުކާރުން ތުހުމަތުކުރާ ގޮތުގައި އިމަމޮގުލޫ އަކީ ކޮރަޕްޓް އަދި ޓެރަރިސްޓް ޖަމާއަތްތަކަށް އެހީތެރިވާ ކުށްކުރާ ޖަމާއަތެއްގެ ލީޑަރެކެވެ.

ސޯޝަލް މީޑިއާގައި ޕޯސްޓްކުރި ވީޑިއޯގައި އިމަމޮގުލޫ ވިދާޅުވީ އޭނާ ހައްޔަރުކުރުމަކީ ރައްޔިތުންގެ އިރާދައަށް ދިން ހަމަލާއެއް ކަމަށާއި އެކަން ނުހުއްޓުވޭނެ ކަމަށެވެ.

އިމަމޮގުލޫގެ ހައްޔަރާއެކު ތުރުކީގައި މުޒާހަރާ ކުރަން ފަށާފައިވާއިރު، އެ ގައުމުގެ ސަރުކާރުން ވަނީ އިސްތަންބުލްގައި އެއްވުންތައް ބޭއްވުން މަނާކޮށްފަ އެވެ. އެގޮތުން މުޒާހަރާތަކަށް ހުރަސް އެޅުމަށް ތުރުކީގެ ގިނަ މަގުތަކެއް ބަންދުކޮށްފައިވާއިރު، މެޓްރޯ ލައިންތަކުގެ ހިދުމަތްވެސް ވަނީ ކެންސަލްކޮށްފަ އެވެ.