އާއިލާ މީހަކު ދާއިމީ ބައްޔަކަށް ފަރުވާ ހޯދާ ނަމަ 30 ދުވަހުގެ ޗުއްޓީއެއް ލިބޭ ގޮތަށް ސިވިލް ސާވިސް ގަވާއިދު އިސްލާހުކޮށްފި އެވެ.
ސިވިލް ސާވިސް ކޮމިޝަން (ސީއެސްސީ)ން އިއްޔެ ގެޒެޓުކުރި އެ އިސްލާހުގަ ބުނެފަވަނީ ގަވައިދުގެ 188 ވަނަ މާއްދާގެ (ހ)ގެ 1 ވަނަ ނަމްބަރާއި 2 ވަނަ ނަމްބަރުގައި ބުނެފައިވާ ހާލަތްތަކުން ކުރެ ހާލަތެއް މުވައްޒަފުގެ މަންމަ، ބައްޕަ، އަނބިމީހާ، ފިރިމީހާ، ދަރިއަކަށް، އެއްބަނޑުއެއްބަފާ މީހަކަށް، އެއްބަނޑު މީހަކަށް، އެއްބަފާ މީހަކަށް ނުވަތަ ޝަރުއީ ގޮތުން ބަލަންޖެހިފައިވާ މީހަކަށް ދިމާވެއްޖެ ނަމަ އަސާސީ މުސާރަ ލިބޭ ގޮތަށް އަހަރަކު 30 ދުވަހުގެ ޗުއްޓީއެއް ލިބޭނެ ކަމަށެވެ.
އެއަށް ކިޔަނީ ”ހާއްސަ ސިއްހީ ބޭނުންތަކަށް ދެވޭ ޗުއްޓީ“ ކަމަށް ގަވާއިދުގަ ވެ އެވެ.
އަދި އެ މާއްދާގެ (ހ) ގެ 1 ވަނަ ނަމްބަރުގައި ބުނާގޮތުން، ބަލިވުމުގެ ސަބަބުން މުވައްޒަފަށް ކަނޑައެޅިފައިވާ ރަސްމީ ގަޑިއަށް މަސައްކަތަށް ނުކުތުމަށް އުޒުރުވެރިވާ ނަމަ ސަލާމުގެ ޗުއްޓީ ދޭންޖެހޭނެ އެވެ.
ހާއްސަ ސިއްހީ ބޭނުންތަކަށް ދޭ ޗުއްޓީ ހޯދުމަށް، އެ ބަލި މީހަކީ ދާއިމީ ނުވަތަ ދިގު މުއްދަތަކަށް ބޭސްފަރުވާ ކުރަންޖެހޭ މީހެއް ކަމާއި ބަލީގެ ވައްތަރާއި ބަލީގެ ސަބަބުން ފަރުވާއަށް ހޭދަވާނެ މުއްދަތު ބަޔާންކޮށް، ހެލްތު މިނިސްޓްރީގައި ރަޖިސްޓްރީކޮށްފައިވާ ސިއްހީ މަސައްކަތްތެރިއެއްގެ މެޑިކަލް ސެޓްފިކެޓް ނުވަތަ ސެޓްފިކެޓު ދޫކުރި ގައުމެއްގެ ރަޖިސްޓްރީކޮށްފައިވާ ސިއްހީ މަރުކަޒަކުން ސިއްހީ މަސައްކަތްތެރިއަކު ދޫކޮށްފައިވާ މެޑިކަލް ސެޓްފިކެޓެއް ހުށަހަޅަންޖެހޭނެ ކަމަށް ގަވާއިދުގައ ބުންޏެވެ.
ގުޅުންހުރި
ސިވިލް ސާވިސް ކޮމިޝަނަށް ތިން މެންބަރަކު އައްޔަނުކޮށްފި
ނާޒިމްގެ އަނބިކަނބަލުން ސީއެސްސީއަށް އައްޔަންކުރަނި
ސީއެސްސީއަށް މުޖުތާޒް އައްޔަންކުރައްވައިފި
މަގާމުން ވަކިކުރުމުގެ ކުރިން ސީއެސްސީގެ ނައިބު އިސްތިއުފާ ދެއްވައިފި
ހައުސިން މިނިސްޓްރީ އުވާލުމުން ބައެއް މުވައްޒަފުން ދޫކޮށްލަން ޖެހިދާނެކަން އަންގައިފި
ސީއެސްސީގެ މުވައްޒަފުންގެ ޒާތީ މައުލޫމާތު ހޯދައި ޖާސޫސު ކުރަމުންދާތާ އެތައް ދުވަހެއް!