ފުޓުބޯޅަ ޓްރެއިނިން ފެސިލިޓީގެ ބިމު ކުލިން އެފްއޭއެމުން 29 މިލިއަން ރުފިޔާ ވަނީ ގެއްލިފައި: އޮޑިޓް 

ފުޓުބޯޅަ ޓްރެއިނިން ފެސިލިޓީއެއް ގާއިމުކުރުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދޫކުރި ބިން ކުއްޔަށް ދީގެން ލިބުނު 29 މިލިއަން ރުފިޔާ ގެއްލިފައިވާ ކަމަށް އޮޑިޓް ރިޕޯޓުގައި ބުނެފިއެވެ.

ފުޓުބޯޅަ ޓްރެއިނިން ފެސިލިޓީ ގާއިމުކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ 2018 ވަނަ އަހަަރުގެ ޖުލައި މަހުގެ 11 ގައި އެފްއޭއެމްއަށް ހުޅުމާލެއިން 230،000 އަކަފޫޓުގެ ބިމެއް ދީފައެވެ.

އެ ބިމުގެ ބައެއް ކުއްޔަށް ދީފައިވާ ގޮތުގެ ތަފްސީލު ބަލައި، އޮޑިޓާ ޖެނެރަލްގެ އޮފީހުން މިއަދު ނެރުނު އޮޑިޓް ރިޕޯޓުގައި ބުނީ 2021 ވަނަ އަހަރުގެ ފެށިގެން 2024 ވަނަ އަހަރުގެ ނިޔަލަށް އެފްއޭމުން 15 ސަބްލީސް އެއްބަސްވުމެއް ހަދައި، ޖުމްލަ 52،210،000 (52.2 މިލިއަން) ރުފިޔާ، މިދިޔަ އަހަރުގެ ނިޔަލަށް ލިބިފައިވާ ކަމަށް ބެލެވޭ އިރު، އެ ފައިސާގެ ތެރެއިން ޖުމްލަ 29،598،200 (29.5 މިލިއަން) ރުފިޔާ ގެއްލިފައިވާކަން ފާހަގަކުރެވިފައިވާ ކަމަށެވެ.

ބިމުގެ ސްލޮޓްތަކާއި އިމާރާތުގެ ފްލޯތައް ކުއްޔަށް ނެގި ފަސް ފަރާތަކުން ނަގުދު ފައިސާ އިންނާއި ޗެކުން އެފްއޭއެމްއަށް ފައިސާ ދެއްކި ކަމަށްބުނެ ހުށަހަޅާފައިވާ އެފްއޭއެމްގެ ސްޓޭމްޕް އަދި އިސް ފަރާތްތަކުގެ ސޮއި ހިމެނޭ ރަސީދުތަކާއި ޕޭމަންޓު ވައުޗާތަކުގެ ޖުމްލަ 14،100،000 (14.1 މިލިއަން) ރުފިޔާ، އެ ފައިސާގެ ތެރޭގައި ހިމެނޭ ކަމަށް އޮޑިޓުގައި ބުންޏެވެ.

އޭގެ އިތުރުން އެ ފައިސާގެ ތެރޭގައި އެފްއޭއެމްގެ ބޭންކު އެކައުންޓުތަކަށް ބިމުގެ ސްލޮޓްތަކުގެ ކުލީގެ ގޮތުގައި ޖަމާކޮށްފައިވާ ފައިސާގެ ތެރެއިން އަމިއްލަ ކުންފުނިތަކާއި އަމިއްލަ ފަރުދުންގެ އެކައުންޓުތަކަށް ފޮނުވާފައިވާ 14،074،060 (14 މިލިއަން) ރުފިޔާ ރުފިޔާ އާއި، އެފްއޭއެމްގެ ބޭންކު އެކައުންޓުތަކަށް ޖަމާކޮށްފައިވާ ފައިސާގެ ތެރެއިން ކޮން ބޭނުމަކަށްކަން ނޭނގި އެކިފަހަރުމަތިން ނަގުދު ފައިސާގެ ގޮތުގައި ނަގާފައިވާ ޖުމްލަ 1،424،140 (1.4 މިލިއަން) ރުފިޔާ ހިމެނޭ ކަމަށް އޮޑިޓް ރިޕޯޓުގައި ބުންޏެވެ.

އަދި އެއްބަސްވުންތަކަށް ބަދަލު ގެނައުމާއި، އެއްބަސްވުންތައް ހަދާފައިވާ ގޮތުން ބޮޑު ގެއްލުމެއް ވެފައިވާ ކަމަށާއި ފުޓުބޯޅަ ޓްރެއިނިން ފެސިލިޓީގެ އިނީޝިއަލް ޕްލޭންގައިވާ އޮފީސް އިމާރާތާއި އެކޮމޮޑޭޝަން ބްލޮކް އަދި ދެ ފުޓުބޯޅަ ޕިޗް ހެދުމަށް އެފްއޭއެމުން 4 ޖުލައި 2018 ގައި އަމިއްލަ ކުންފުންޏަކާއެކު ހެދި އެއްބަސްވުމުގެ ދަށުން ކުރަންޖެހޭ މަސައްކަތްތަކުގެ ތެރެއިން އެ ކުންފުނިން ނިންމާފައިވާ މަސައްކަތުގެ ގޮތުގައި ފާހަގަކުރެވެނީ އޮކޮމޮޑޭޝަން ބްލޮކްގެ 90 ޕަސަންޓު މަސައްކަތް ކަމަށް އޮޑިޓުގައި ބުންޏެވެ.

އޮޑިޓުގައި ބުނީ ޓްރެއިނިން ފެސިލިޓީ ހެދުމަށް ހަވާލުކުރި އެއްބަސްވުމުގެ ދަށުން ނިންމަންޖެހޭ އޮފީސް އިމާރާތާއި ފުޓުބޯޅަ ޕިޗްތަކުގެ އެކަށީގެންވާ މަސައްކަތެއް ފެށިފައިނުވި ނަމަވެސް، އެފްއޭއެމުން މިހާތަނަށް އެ ކުންފުންޏަށް 32،302،143 (32.3 މިލިއަން) ރުފިޔާ ދީފައިވާ ކަމަށާއި އޭގެ ތެރޭގައި ނިމިފައިވާ މަސައްކަތުގެ އަގަށްވުރެ އިތުރަށް ދީފައިވާ 14،277،082 (14.2 މިލިއަން) ރުފިޔާ ހިމެނޭ ކަމަށެވެ.

އޭގެ އިތުރުން އެޗްޑީސީއާއެކު ހެދި އެއްބަސްވުމަށް ގެނައި އިސްލާހަކާ ގުޅިގެން ފެސިލިޓީގެ ބޭނުމަށް ކަނޑައަޅާފައިވާ ޕިޗްތަކުގެ ޖާގައިން ގާތްގަނޑަކަށް 30 ޕަސަންޓު ކުޑަވެ، އެ މަޝްރޫއުގެ އިނީޝިއަލް ކޮންސެޕްޓްތަކުގައި ކަނޑައަާޅފައިވާ ގޮތަށް 90،000 އަކަފޫޓު ދެ ފުޓުބޯޅަ ޕިޗް އެޅުމަށް ބޭނުންވާ ޖާގަ ނެތް ކަމަށް އޮޑިޓުގައި ބުންޏެވެ.