ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ކުރެއްވި ތުހުމަތުތައް ހޯމް މިނިސްޓަރު އަލީ އިހުސާން ދޮގު ކުރައްވައިފި އެވެ.
ޝަމްއާންގެ މައްޗަށް ދައުލަތުން ކުރާ ފޭރުމުގައި ބައިވެރިވުމުގެ ދެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދެ ދައުވާ އަދި މަނީ ލޯންޑަރިންގެ އެއް ދައުވާ ސާބިތުވާ ކަމަށް ކަނޑައަޅައި އޭނާ 25 އަހަރަށް ޖަލަށް ލާން ކްރިމިނަލް ކޯޓުން އިއްޔެ ވަނީ ހުކުމްކޮށްފަ އެވެ.
ހުކުމް ކުރުމުގެ މަޖިލީހަށް ވަނުމުގެ ކުރިން ޝަމްއާން ވަނީ އޭނާގެ މައްޗަށް އުފުލާފައިވާ ދައުވާތަކަކީ އިހްސާން އަޑީގައި ހުންނަވައިގެން އޭނާ ފްރޭމް ކުރުމަށް އުފުލި ދައުވާތަކެއް ކަމަށް ތުހުމަތު ކުރައްވައިފަ އެވެ. އަދި ބިދޭސީން ގެނައުމަށް ދޫކުރާ ކޮންމެ ކޯޓާއަކަށް 8000 ރުފިޔާގެ މަގުން އަދި އެޕްރޫވް ކުރާ ބަންގްލަދޭޝް މީހަކަށް 1800 އެމެރިކާ ޑޮލަރުގެ މަގުން އިހުސާން ފައިސާ ނަންގަވަމުންދާ ކަމަށްވެސް ޝަމްއާން ތުހުމަތު ކުރި އެވެ.
އެކަމާ ގުޅިގެން އެކްސްގައި މިއަދު ކުރެއްވި ޕޯސްޓެއްގައި އިހުސާން ވިދާޅުވީ، ޝަމްއާން އެ ކުރަނީ ސާބިތު ނުހިފޭ ދޮގު ތުހުމަތުތަކެއް ކަމަށާއި ތަކުރާރުކޮށް އެ ކުރާ ތުހުމަތުތަކާ ގުޅޭ އެއްވެސް ހެއްކެއް ނުވަތަ ގަރީނާއެއް ނެތްއިރު، އޭނާ އެ ހަދަނީ ދޮގުކަން ކުރިންވެސް މީޑިއާއަށް ތިލަކޮށްދީފައިވާނެ ކަމަށެވެ.
”ޝަމްއާން ފްރޭމްކޮށްފައިވާ ކަމަށް ބުނާ ވާހަކައަކީވެސް އެއްވެސް ހަގީގަތެއް އޮތް ވާހަކައެއް ނޫންކަން. މި މައްސަލައިގައި ފުލުހުން ހޯދާފައިވާ ހެކިތަކުން ސާފު. މި މައްސަލައިގައި ކަންހިނގާފައިވާ ގޮތް ތަފުސީލުކޮށް ރައްޔިތުންނަށް ސާފުކޮށްދިނުމަށް އަޅުގަނޑު ވާނީ ފުލުހުންގެ މުއައްސަސާގައި އެދިފައި،“ އިހުސާން ވިދާޅުވި އެވެ.
