އީރާން އާއެކު ސުލްހައިގެ އެއްބަސްވުމަކަށް އާދެވިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއުލާންކޮށްފި އެވެ.
އީރާން އާއި އެމެރިކާއާ ދެމެދު ސުލްހައިގެ އެއްބަސްވުމަކަށް އާދެވިފައިވާކަން އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ވެސް ވަނީ ކަށަވަރުކޮށްދެއްވައިފަ އެވެ. މި އެއްބަސްވުމުގެ ދަށުން ލުބުނާން ހިމެނޭ ގޮތަށް، ހުރިހާ ދިމާލަކުން ”ވަގުތުން އަދި ދާއިމީކޮށް“ ހަނގުރާމަ ހުއްޓާލުމަށް ވަނީ އެއްބަސްވެފަ އެވެ.
އިއްޔެ އުމުރުން 80 އަހަރު ފުރުނު ޓްރަމްޕް ބުނީ، މި އެއްބަސްވުމުގެ ސަބަބުން ހޮރްމޫޒް ކަނޑުއޮޅިން އެއްވެސް ފީއަކާ ނުލައި އުޅަނދުފަހަރަށް ދަތުރުކުރެވޭނެ ކަމަށެވެ. މިދިޔަ ޑިސެމްބަރު 28 ވަނަ ދުވަހު އެމެރިކާއާއި އިސްރާއީލުން އީރާނަށް ދޭން ފެށި ހަމަލާތަކާ ގުޅިގެން އެ ކަނޑުއޮޅި އޮތީ ބޮޑުބައެއް ބަންދުކޮށްފަ އެވެ.
”އެންމެހާ ފަރާތްތަކަށް މަރުހަބާ! ހޮރްމޫޒް ކަނޑުއޮޅި އެއްވެސް ފީއަކާ ނުލައި ހުޅުވާލުމުގެ ފުރިހަމަ ހުއްދަ އަޅުގަނޑު މިއަދު ދީފީމެވެ. އަދި ހަމައެއާއެކު، އެމެރިކާގެ ކަނޑުގެ ސިފައިން އެ ސަރަހައްދު ބަންދުކޮށްފައި އޮތް އޮތުން ވަގުތުން ނިމުމަކަށް ގެނައުމަށް ވެސް އަމުރުކޮށްފީމެވެ. ދުނިޔޭގެ އުޅަނދުފަހަރުތަކުން، އިންޖީނުތައް ޖައްސާށެވެ. ތެޔޮ ދައުރުވާން ދޫކޮށްލާށެވެ!“ ޓްރުތް ސޯޝަލްގައި ޓްރަމްޕް ލިޔުނު ޕޯސްޓެއްގައި ބުނެފައިވެ އެވެ.
އޭގެ ފަހުން ކުރި އެހެން ޕޯސްޓެއްގައި ޓްރަމްޕް ބުނީ، މި މަތިވެރި އެއްބަސްވުމުގެ ސަބަބުން މުޅި ސަރަހައްދަށް ސުލްހައާއި އަމާންކަން ލިބިގެންދާނެ ކަމަށެވެ. އަދި އީރާން އާއެކު މިއަށްވުރެ ފުޅާ ދާއިރާއެއްގައި ސުލްހައިގެ އެއްބަސްވުމެއް ކުރިއަށް އޮތްތަނުގައި ވެވޭނެކަމުގެ އިޝާރާތެއް ވެސް އޭނާ ދިނެވެ.
”ވަރަށް ގިނަ ރައީސުން އީރާނާއެކު ސުލްހަ ގާއިމުކުރަން މަސައްކަތް ކުރެއްވި، ނަމަވެސް އަޅުގަނޑުގެ ކުރިން އެންމެން ވަނީ ނާކާމިޔާބުވެފައި. މި ސަރަހައްދުގެ ލީޑަރުންނަށް ފުރަތަމަ ފަހަރަށް މިވަނީ ހަގީގީ ސުލްހަ ހޯދައިދެވޭނެ ރައީސަކު ފެނިފައި. ހުކުރު ދުވަހު އެއްބަސްވުމުގައި ސޮއިކުރުމާއެކު، ކަނޑުއަޑީގެ މައިންތައް ނެގުމަށްޓަކައި ކަނޑުއޮޅި ހުޅުވާލެވޭނެ. އޭރުން މި ސަރަހައްދަށާއި މުޅި ދުނިޔެއަށް އަނެއްކާވެސް ދެކޮޅަށް ތެޔޮ ދައުރުވާން ފަށާނެ،“ ޓްރަމްޕް ބުނެފައިވެ އެވެ.
އެއްބަސްވުމުގައި ސޮއިކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އަންނަ ހުކުރު ދުވަހު ސްވިޒަލޭންޑްގައެވެ.
