ރައީސް މުއިއްޒުގެ ފުރަތަމަ ރިޔާސީ ބަޔާން އިއްވެވުން އަންނަ މަހުގެ ފަސް ވަނަ ދުވަހު

ރައީސް ޑރ. މުހައްމަދު މުއިއްޒު އިއްވަވާ ފުރަތަމަ ރިޔާސީ ބަޔާން އިއްވުން އަންނަ މަހުގެ ފަސް ވަނަ ދުވަހު އޮންނާނެއެވެ.

މިގޮތަށް މި ހަމަޖެހުނީ ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ފުރަތަމަ ޖަލްސާ އެ ދުވަހު ބާއްވަން މަޖިލީހުގެ ރައީސް މުހައްމަދު އަސްލަމް މިއަދު ހަމަޖެއްސެވުމުންނެވެ.

ގާނޫނު އަސާސީގައި ބުނާގޮތުން ކޮންމެ އަހަރަކު ވެސް ރައްޔިތުންގެ މަޖިލީސް ހުޅުވުމަށް ބާއްވާ ޖަލްސާގައި ރައީސުލްޖުމްހޫރިއްޔާ ރިޔާސީ ބަޔާން އިއްވަވަން ޖެހޭނެ ކަމަށެވެ. އެ ރިޔާސީ ބަޔާނުގައި ގައުމުގެ އޭރުގެ ހާލަތު ބަޔާންކޮށްދީ، އިތުރަށް ރަނގަޅު ކުރުމަށް އެ އަހަރު ދުވަހަށް ރައީސް ކުރައްވަވަން ރާވާފައިވާ ކަންކަން މަޖިލީހަށް އިއްވަވަން ޖެހެއެވެ.

ރައްޔިތުންގެ މަޖިލީސް އަލަށް ހުޅުވާއިރު، އިދިކޮޅު އެމްޑީޕީގެ ގިނަ މެމްބަރުންތަކެއް ވަނީ ސަރުކާރު ހިންގާ ޕީއެންސީއާ ގުޅިވަޑައިގެންފައެވެ.

މަޖިލީހުގެ މިދިޔަ އަހަރުގެ ފަހު ދައުރު ނިންމާލީ ރައީސް މުއިއްޒުގެ ކެބިނެޓަށް ރުހުންދިނުމާ މެދު ގޮތެއް ނުނިންމައެވެ.