މައްސަލަ ބޮޑުވެ، މެންބަރުން ރަތަށް އެރުމުން ޕްރައިމަރީގައި އެންމެނަށް ވާދަކުރެވޭ ގޮތަށް ހަދައިފި

ޕީޕީއެމް/ ޕީއެންސީގެ ޕްރައިމަރީގައި ވާދަކުރަން ނަން ހުށަހެޅި ހުރިހާ މީހުންނަށް ޕްރައިމަރީގައި ވާދަކުރެވޭ ގޮތަށް ޕްރައިމަރީ ބާއްވަން އެ ކޯލިޝަނުން ނިންމައިފި އެވެ.

ޕާޓީ ތެރޭގައި ފިތުނު އުފެއްދި ކަމަށް ތުހުމަތުކޮށް އަދި އެކަށީގެންވާ ހިދުމަތެއް ކޮށްދީފައިނުވާ ކަމަށް ބުނެ ޕްރައިމަރީއަށް ނަން ހުށަހެޅި ބައެއް މީހުނަށް ވާދަ ނުކުރެވޭނެކަން އިއްޔެ ވަނީ އަންގައިފަ އެވެ. އެކަމާ ގުޅިގެން ގިނަ ބައެއްގެ ނުރުހުން އެ ޕާޓީގެ ލީޑާޝިޕަށް އަމާޒުވެ، ބައެއް މީހުން ވަނީ ޕާޓީގެ އޮފީހަށް ގޮސް އަޑުގަދަކޮށްފަ އެވެ.

”ޕީޕީއެމް/ޕީއެންސީގެ ޕްރައިމަރީގައި ވާދަކުރައްވަން ނަން ހުށަހެޅުއްވި ބައެއް ބޭފުޅުންނަށް ކުރިމަތި ނުލެވޭ ގޮތަށް ނިންމުމާ ގުޅިގެން ހުށަހެޅުނު ޝަކުވާތަކަށް ރިއާޔަތް ކުރެއްވުމަށްފަހު، ޕްރައިމަރީގައި ވާދަކުރަން ނަން ހުށަހެޅުއްވި ހުރިހައި ބޭފުޅުންނަށް ވާދަކުރެއްވޭ ގޮތަށް ޕްރައިމަރީ ބާއްވަން ޕާޓީގެ ރައީސް، ރައީސް ޑރ. މުހައްމަދު މުޢިއްޒު ނިންމަވައިފި,“ ޕީއެންސީގެ ޗެއާމަން އަބްދުއްރަހީމް އަބްދުالله (އަދުރޭ) އެކްސްގައި ކުރެއްވި ޕޯސްޓެއްގައި ވިދާޅުވެފައިވެ އެވެ.

ޕީއެންސީން އެ ޕާޓީގެ ޕްރައިމަރީ ބޭއްވުމަށް އެންމެ ފުރަތަމަ ނިންމީ މި މަހުގެ 20 ވަނަ ދުވަހު އެވެ. ނަމަވެސް ފަހުން މިދިޔަ ޑިސެމްބަރު 23 ވަނަ ދުވަހު ޕްރައިމަރީ ބޭއްވުމަށް ނިންމުމަށްފަހު، އަނެއްކާވެސް މި މަހުގެ 20 ވަނަ ދުވަހު ޕްރައިމަރީ ބާއްވާ ގޮތަށް ނިންމި އެވެ.

ޕީއެންސީގެ ޕްރައިމަރީ މިހާރު ބާއްވަން ނިންމާފައިވަނީ މި މަހުގެ 27 ވަނަ ދުވަހު އެވެ.