ޕީއެންސީގެ މަޖިލިސް ޕްރައިމަރީގެ ވޯޓުލުން ކުރިއަށް، ޕާޓީގެ ދަފްތަރުން މީހުން އުނިކުރި ކަމުގެ ތުހުމަތު

ސަރުކާރު ހިންގާ މައި ދެ ޕާޓީ، ޕީޕީއެމް/ ޕީއެންސީގެ މަޖިލިސް އިންތިހާބުގެ ޕްރައިމަރީގެ ވޯޓުލުން ފަށައިފި އެވެ.

މިއަދު ހެނދުނު 10:00 ގައި ޕްރައިމަރީގެ ވޯޓުލުން ފަށާފައިވާއިރު ޕްރައިމަރީގައި 73 ދާއިރާއެއްގެ ޓިކެޓަށް 283 މީހަކު ވާދަކުރެ އެވެ. ވޯޓުލުން މިއަދު ހަވީރު 5:00 އާ ހަމައަށް ކުރިއަށް ދާނެ ކަމަށް އެ ކޯލިޝަނުން ވަނީ ބުނެ އެވެ.

ޕްރައިމަރީގައި 227 ވޯޓު ފޮށި ބަހައްޓާފައިވާއިރު، މާލޭގައި ވޯޓު ފޮށިތައް ބަހައްޓާފައިވަނީ ހަ ތަނެއްގައެވެ. އޭގެ އިތުރުން، އަތޮޅުތެރޭގެ މީހުން ވޯޓު ލުމަށް ވޯޓު ވޮށިތައް ބަހައްޓާފައި ވަނީ ހެންވޭރު ދަނޑުގަ އެވެ.

މިއަދު ބާއްވާ ޕްރައިމަރީގައި 71،597 މީހުންނަށް ވޯޓު ލުމުގެ ހައްގު ލިބިގެންވާ ކަމަށް ޕީޕީއެމް/ ޕީއެންސީން ބުނި ނަމަވެސް ޕާޓީގެ ދަފްތަރުން މީހުން އުނިކޮށްފައިވާ ކަމަށް ޕްރައިމަރީގައި ވާދަކުރައްވާ ބައެއް ބޭފުޅުން ގެންދަވަނީ ތުހުމަތު ކުރައްވަމުންނެވެ.