އައްޑޫ ސިޓީ ގަމުގައި އޮންނަ އިންޑިއާގެ ހެލިކޮޕްޓަރު ދުއްވަން އަންނަ އެ ގައުމުގެ މަދަނީ މީހުން މިއަދު ރާއްޖެ އައިސްފައިވާ ކަމަށް ޑިފެންސް މިނިސްޓްރީން ބުނެފި އެވެ.
ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމަކީ ރައީސް ޑރ. މުހައްމަދު މުއިއްޒުގެ ރިޔާސީ އެންމެ ބޮޑު ވައުދެވެ. އެކަމުގައި ދިވެހި ސަރުކާރާއި އިންޑިއާ ސަރުކާރާ ދެމެދު ބޭއްވި މަޝްވަރާތަކަށްފަހު ދެ ގައުމުން ވަނީ ރާއްޖޭގައި ގާއިމުކޮށްފައިވާ އިންޑިއާގެ ތިން އޭވިއޭޝަން ޕްލެޓްފޯމުގެ ތެރެއިން އެއް ޕްލެޓްފޯމުގައި ތިބި އިންޑިއާ ސިފައިން އަންނަ މާޗު މަހުގެ 10 ވަނަ ދުވަހުގެ ކުރިން ފޮނުވާލަން އެއްބަސްވެފައެވެ.
ޑިފެންސް މިނިސްޓްރީން މިރޭ ނެރުނު ނޫސްބަޔާނެއްގައި ބުނީ، ސ. ގަމުގައި އޮންނަ ހެލިކޮޕްޓަރު ދުއްވަން މިހާރު އައްޑޫގައި ތިބި އިންޑިއާ ސިފައިންގެ ބަދަލުގައި ހެލިކޮޕްޓަރު ދުއްވަން އަންނަ މަދަނީ މީހުން މިއަދު ހަވީރު ރާއްޖެ އައިސްފައިވާ ކަމަށާއި އެ ޓީމު މިރޭގެ ވަގުތެއްގައި އައްޑޫއަށް ގޮސް ހޭންޑްއޯވާ/ ޓޭކްއޯވާގެ ކަންކަން ފުރިހަމަ ކުރާނެ ކަމަށެވެ. އަދި ކަނޑައެޅިފައިވާ ތާރީހަށް އައްޑޫގައި ތިބި އިންޑިއާ ސިފައިން ރާއްޖެއިން ފައިބާނެ ކަމަށްވެސް ބުންޏެވެ.
ޑިފެންސް މިނިސްޓްރީން ބުނީ، އައްޑޫގައި ތިބި އިންޑިއާ ސިފައިން ބަދަލުވުމުގެ މަރުހަލާތަކުގައި ހިމެނިގެން ގަމުގައި އޮންނަ ހެލިކޮޕްޓަރު މަރާމާތަށް އިންޑިއާއަށް ގެންދިއުމަށްޓަކައި 27 ފެބްރުއަރީން ފެށިގެން އެ ހެލިކޮޕްޓަރުގެ ޓެސްޓް ފްލައިޓުތަކެއް ކުރިއަށްގެންދާނެ ކަމަށެވެ. އަދި އެ ހެލިކޮޕްޓަރު ގެންދިއުމަށާއި އޭގެ ބަދަލުގައި ގެންނަ ހެލިކޮޕްޓަރު ހިފައިގެން އަންނަ އިންޑިއާގެ މަނަވަރު 28 ފެބްރުއަރީގައި އައްޑޫ ސިޓީއަށް އަންނާނެ ކަމަށްވެސް ބުންޏެވެ.
އިންޑިއާ ސަރުކާރާއި ދިވެހި ސަރުކާރާ ދެމެދު ކުރި މަޝްވަރާތަކުގައި ލ. ކައްދޫ އާއި ހދ. ހަނިމާދޫގައި އޮންނަ ހެލިކޮޕްޓަރާއި ޑޯނިއާ މަތިންދާބޯޓު ދުއްވާ އިންޑިއާ ސިފައިން އަންނަ މެއި މަހުގެ 10 ވަނަ ދުވަހު ރާއްޖެއިން ފައިބާނެއެވެ.
ގުޅުންހުރި
ދިވެހިންގެރާއްޖެ ހޯދަން ރައީސް މުއިއްޒު 15 އަހަރު ވެރިކަމުގައި ބަހައްޓަންޖެހޭ: އަބްދުއްރަހީމް
ކޮރެއާގެ ކުންފުންޏަކަށް 1 މަސް ތެރޭ 3 މިލިއަން ޑޮލަރު ދައްކަން
އުމުރުން ދުވަސްވީ މީހުންގެ އަތުން ފޭރުމުގެ މައްސަލަތައް އިތުރުވަނީ
ރަށެއްގެ ބަނދަރަށް ވަންނަން ވާދަޖެހި ކަމަށް ބުނާ ލޯންޗުތަކުގެ މައްސަލަ ބަލަނީ
ޖެންޒީންނަށް ވިސްނޭނެ ގޮތަކަށް އިސްލާމް ދީނުގެ ކަންކަން ކިޔައިދޭންޖެހޭ: ރައީސް
ފިހާރައެއްގެ ތެރޭގައި ހުރި މީހަކަށް ތޫނު އެއްޗަކުން ހަމަލާދީފި