އިންތިހާބު ފަސްކުރާ ބިލް އަވަހަށް ތަސްދީގު ކުރަން އެމްޑީޕީން ގޮވާލައިފި

ރޯދައިގެ ފަހުން މަޖިލިސް އިންތިހާބު ބާއްވަން ލާޒިމްވާގޮތަށް އިންތިހާބާ ބެހޭ އާންމު ގާނޫނަށް ރައްޔިތުންގެ މަޖިލީހުން ގެނައި އިސްލާހު އަވަހަށް ތަސްދީގު ކުރެއްވުމަށް ރައީސް ޑރ. މުހައްމަދު މުއިއްޒަށް އިދިކޮޅު އެމްޑީޕީން ގޮވާލައިފިއެވެ.

އެމްޑީޕީން މިކަމަށް ގޮވާލީ މިއަދު އެ ޕާޓީގެ ޕާލަމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމެއްގައެވެ.

ނޫސްވެރިންނާ ވާހަކަދައްކަވަމުން އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު ރަޝީދު ހުސައިން (ބިގޭ) ވިދާޅުވީ

ކުރިން އެ ބިލް ފާސްކުރި ވަރަށް ވުރެ ބޮޑު އަޣްލަބިއްޔަތަކުން އަނެއްކާވެސް އެ ބިލް ފާސްކުރުމުން ރައީސް މުއިއްޒަށް އިތުރު ޗޮއިސްއެއް ނޯންނާނެ ކަމަށެވެ.

އެ ބިލް މިއަދު ފާސްކުރީ 47 މެމްބަރުންގެ ވޯޓުންނެވެ.

ގާނޫނު އަސާސީ ބުނާގޮތުން ތަސްދީގު ނުކުރި ބިލެއް ދެވަނަ ފަހަރަށް މަޖިލީހުން ފާސްކޮށްފިނަމަ އެ ބިލެއް ތަސްދީގު ކުރުން ރައީސުލްޖުމްހޫރިއްޔާގެ މައްޗަށް ލާޒިމްވާނެއެވެ. އެކަމަކު އެކަމަށް މުއްދަތެއް ދީފައެއްނުވެއެވެ.

އެ ބިލް ފާސްކުރި ފަހުން ނ. ހޮޅުދު އަށް މިއަދު ހަވީރު ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވަނީ މަޖިލިސް އިންތިހާބު އޮންނާނީ އިލެކްޝަންސް ކޮމިޝަނުން ކުރިން ވެސް ކަނޑައަޅާފައިވާ ތާރީހު ކަމަށްވާ އަންނަ މަހުގެ 17 ގައި ކަން ވަރަށް ހަރުއަޑުން ވިދާޅުވެފައެވެ.

“17 މާޗުގައި އޮންނަ އިންތިހާބުގައި ތިޔަބޭފުޅުން ނިންމައި ދެއްވަންވީ މުސްތަގުބަލް. އަޅުގަނޑު އުއްމީދު ކުރަނީ ރައްޔިތުން އެދޭ މިސްރާބަށް ގެންދިއުމަށް އަތުކުރި އޮޅާލައިގެން ސަރުކާރާ އެކު ކުރިއަށް ދާން،” ރައީސް ވިދާޅުވިއެވެ.