އަނާރާ އާއި ފިރިކަލުންވެސް މަޖިލީހަށް، 20 ވަނަ މަޖިލީހުގައި އިންނަވާނެ ހަމައެކަނި ދެމަފިރިކަނބަލުން

މިއަދު ބޭއްވި ރައްޔިތުންްގެ މަަޖިލީހުގެ އިންތިހާބުގައި ޑރ. އަނާރާ ނައީމް އާއި ފިރިކަލުން އާދަމް ޝަފީގް ކާމިޔާބު ހޯއްދަވައިފި އެވެ. މިއީ ކުރިއަށް ވިހި ވަނަ މަޖިލީހުން ފެނިގެންދާނެ ހަމައެކަނި ދެމަފިރިކަނބަލުންނެވެ.

އަށާރަ ވަނަ މަޖިލީހުގައި މަކުނުދޫ ދާއިރާ ތަމުސީލު ކުރެއްވި އަނާރާ މި ފަހަރު އިންތިހާބުވެވަޑައިގެންނެވީ ހުރާ ދާއިރާ އިންނެވެ. އެ ދާއިރާއަށް ވާދަކުރެއްވުމަށް ޕީއެންސީ ޓިކެޓް ހޯއްދެވުމަށް ޕްރައިމަރީގައިވެސް އޭނާ ވާދަކުރެއްވި އެވެ.

ނާކާމިޔާބީއާ ކުރިމަތިވެވަޑައިގަތުމުން ދެން ނުކުންނެވީ އަމިއްލަ ގޮތުންނެވެ. ނަމަވެސް ސަރުކާރާއި ރައީސް މުއިއްޒު ފަހުން ވަނީ އޭނާއަށް ތާއީދު ކުރައްވައި ކެމްޕެއިންވެސް ކުރައްވައިފަ އެވެ.

އަނާރާގެ ފިރިކަލުން ވާދަކުރެއްވީ މަކުނުދޫ ދާއިރާ އަށެވެ. އޭނާ އެ ގޮނޑި ކާމިޔާބު ކުރެއްވީ އަދާލަތު ޕާޓީގެ ރައީސް އިމްރާން އަބްދުﷲ އާއި އެ ދާއިރާގެ މިހާރު ކެންޑިޑޭޓް މުހައްމަދު ރާއީއާ ވާދަކުރައްވަ އެވެ.