ރައީސްގެ ބޮޑު ވައުދު ފުއްދަވައިފި، އިންޑިއާގެ ހުރިހާ ސިފައިން ފައިބައިފި

ރާއްޖޭގައި ގާއިމުވެ ތިބި އިންޑިއާ ސިފައިންގެ ފަހު ބެޗު ރާއްޖެ ފައިބައިފައިވާ ކަމަށް ސަރުކާރުން މިރޭ ބުނެފި އެވެ.

ރާއްޖޭގައި ތިބި އިންޑިއާ ސިފައިން ބޭލުމަކީ ރައީސް ޑރ. މުހައްމަދު މުއިއްޒުގެ އެންމެ ބޮޑު ސިޔާސީ ވައުދެވެ. އެ ވައުދާ ގުޅިގެން ސަރުކާރުން ކުރި މަޝްވަރާތަކަށްފަހު ރާއްޖޭގައި ތިބި އިންޑިއާ ސިފައިން މާދަމާގެ ކުރިން ފޮނުވާލަން އިންޑިއާއިން އޮތީ އެއްބަސްވެފަ އެވެ.

ރައީސް އޮފީހުގެ އިސް ތަރުޖަމާނު ހީނާ ވަލީދު މިރޭ ވަނީ ރާއްޖޭގައި ތިބި އިންޑިއާ ސިފައިންގެ ތިންވަނަ ބެޗު ރާއްޖެއިން ފުރިކަން ކަށަވަރު ކޮށްދެއްވައިފަ އެވެ. ނަމަވެސް އެކަމާ ގުޅޭ އިތުރު އެއްވެސް މައުލޫމާތެއް ނުދެއްވަ އެވެ. ވިދާޅުވީ ވަރަށް ތަފުސީލުކޮށް އެކަމާ ގުޅޭ މައުލޫމާތު ވަރަށް އަވަހަށް ހިއްސާ ކުރައްވާނެ ކަމަށް އެކަންޏެވެ.

އިންޑިއާ ސިފައިން ރާއްޖޭގައި ތިބި ކަމަށް ސަރުކާރުން ބުނަނީ އައްޑޫގެ އިތުރުން ހދ. ހަނިމާދޫ އަދި ލ. ކައްދޫގައެވެ.