މާލޭގައި ފުޅާ ދާއިރާއެއްގައި ހަށިވިއްކަމުން ދިޔަ ދެ އަންހެނަކު އަތުލައިގެންފި

މާލޭގައި ހަށިވިއްކާ ކަމަށް ތުހުމަތުވާ ދެ ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.

އިމިގްރޭޝަނުން ސޯޝަލް މީޑިއާގައި ކުރި ޕޯސްޓެއްގައި ބުނީ، ވިއެޓްނާމަށް ނިސްބަތްވާ އެ ދެ މީހުން ހައްޔަރުކުރީ މާލޭގައި ފުޅާ ދާއިރާއެއްގައި ހަށިވިއްކާ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބުމާ އެކު ރޭ ހިންގި ހާއްސަ ރެއިޑް އޮޕަރޭޝަނެއްގައި ކަމަށެވެ.

އިމިގްރޭޝަނުން ކުރި ޕޯސްޓްގައި އެ ދެ އަންހެނުން އަތުން ފެނުނު ގިނަ އަދަދެއްގެ ފައިސާގެ ފޮޓޯވެސް އާންމުކޮށްފައިވެ އެވެ.

ނަމަވެސް އެކަމުގެ އިތުރު ތަފުސީލެއް ދީފައެއް ނުވެ އެވެ.

އިމިގްރޭޝަނުން ގެންދަނީ ގާނޫނާހިލާފަށް ރާއްޖޭގައި އުޅޭ ބިދޭސީން ހޯދައި އެމީހުން ރާއްޖެ އިން ފޮނުވާލުމަށް ހާއްސަ އޮޕަރޭޝަންތަކެއް ހިންގަމުންނެވެ.