އުތުރުތިލަފަޅު ހިއްކައިގެން ތަރައްގީކުރާ ދަނޑުވެރިކަމުގެ ޒޯނުގައި އަލުވި އަދި ފިޔާ ހިމެނޭހެން 10 ވައްތަރެއް ހައްދާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ރާއްޖޭގެ ފުޑް ސެކިއުރިޓީ ވަރުގަދަކޮށް، ރާއްޖޭގައި މޭވާއާއި ތަރުކާރީ އަދި ޕޯލްޓްރީ އުފައްދާ މިންވަރު އިތުރުކުރުމާއެކު އިމްޕޯޓަށް ބަރޯސާވާ މިންވަރު ކުޑަކުރުމަށް އުތުރުތިލަފަޅުގައި ދަނޑުވެރިކަމުގެ ޒޯނެއް ތަރައްގީ ކުރުމުގެ މަސައްކަތް މޯލްޑިވްސް އިންޑަސްޓްރިއަލް ޑިވަލޮޕްމެންޓް ފްރީ ޒޯން (އެމްއައިޑީ) އިން ހަވާލުކޮށްފައި ވަނީ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ) އާއެވެ.
އެ މަސައްކަތް އެ ކުންފުންޏާ ހަވާލުކުރީ މިދިޔަ މާޗު މަހުގެ ތެރޭގަ އެވެ. ނަމަވެސް އެ މަޝްރޫއު ހަވާލުކުރީ ކިހާ ވަރަކަށް ކަމެއް ސަރުކާރަކުން ނުބުނެ އެވެ.
އެ މަޝްރޫއުގެ ދަށުން ދަނޑުވެރިކަމުގެ ޒޯން ތަރައްގީ ކުރުމަށް އުތުރުތިލަފަޅުން 200 ހެކްޓަރުގެ ބިން ހިއްކާނެ އެވެ. އަދި އެތަނުގައި ފަސިންޖަރުންނާއި މުދާ އުފުލާ ޓާމިނަލަކާއި ދަނޑުވެރިކަމުގެ އިންޑަސްޓްރިއަލް ޕާކެއް ވެސް ތަރައްގީ ކުރަން ވަނީ ނިންމައިފަ އެވެ.
ޕީއެސްއެމްގެ ’ރާއްޖެމިއަދު‘ ޕްރޮގްރާމުގައި ރޭ ވާހަކަދައްކަވަމުން ސައީދު ވިދާޅުވީ ސަރުކާރުގެ ވިސްނުމަކީ ދުނިޔޭގެ އެންމެ މޮޅެތި ޓެކްނޮލޮޖީއާއި ގޮތްތައް އަދި ފަންނީ ބޭފުޅުން ރާއްޖެ ގެނެސް، ދެމެހެއްޓެނިވި ގޮތެއްގައި ދަނޑުވެރިކަމުގެ ޒޯންގެ މަސައްކަތް ކުރިއަށް ގެންދިއުން ކަމަށެވެ.
އަދި ދަނޑުވެރިކަމުގެ ޒޯންގައި ރާއްޖެއިން ބޭރުން އެތެރެކުރާ ބައެއް ބާވަތްތަކުގެ 70 ޕަސެންޓް ހެއްދޭނެ ކަމަށްވެސް ވިދާޅުވި އެވެ.
”ރާއްޖެއަށް އިރުއިރުކޮޅާ، ކަމެއް ދަމެއް ބޮޑުވާއިރު ފިޔާ އަލުވި ކުކުޅުބިސް މިހެން ގޮސް ރާއްޖޭގެ ރައްޔިތުން އާންމުކޮށް ބޭނުންކުރާ ގިނަ އަދަދަކަށް އިމްޕޯޓްކުރާ ގިނަ އަދަދެއްގެ ސާމާނު ނުލިބި، ނުވަތަ ލިބުމަށް ގޮތްޖެހުންތައް ދިމާވާ ހާލަތްތައް އާދޭ. އެހެން ނަމަވެސް މޯލްޑިވްސް އެގްރިކަލްޗާ އިކޮނޮމިކް ޒޯންގެ ތެރެއިން މިހާރުވެސް ބައިނަލްއަގުވާމީ ފުންނާބުއުސް ބޭފުޅުންނާ ހަވާލުކޮށްގެން ކޮށްފައިވާ ދިރާސާތަކުގެ އަލީގައި 10 ވައްތަރުގެ ބާވަތް، އޭގެ ތެރޭގައި އަލުވި، ފިޔާވެސް ހިމެނޭ ގޮތަށް ރާއްޖޭގެ ރައްޔިތުން ބޭނުންކުރާ. އެ އަދަދުގެ 70 ޕަސެންޓް އެ ތަނުން އުފެއްދޭނެ،“ ސައީދު ވިދާޅުވި އެވެ.
އޭނާ އިތުރަށް ވިދާޅުވީ، ދަނޑުވެރިކަމުގެ ޒޯންގައި ދަނޑުވެރިކަމުގެ ފަންނު ދަސްކުރެވޭނެ ސްކޫލުތަކާއި ދިރާސާ ކުރެވޭނެ އެންމެ ވަރުގަދަ ފެސިލިޓީތައްވެސް ގާއިމުކުރާނެ ކަމަށެވެ.
71 Comments
ގުޅުންހުރި
ކުޑަކުއްޖަކާ ބެހިގެން ޖަލަށްލި މީހަކު މިނިވަން ކުރި ވާހަކައަކީ ދޮގެއް، އޭނާ
މާރާމާރީއެއް ހުއްޓުވަން އުޅުނު ފުލުހަކަށް ތޫނު އެއްްޗަކުން ހަމަލާ ދޭން އުޅެފި
ގުޅީގައި ފާނަބަސަންދު ފެތުރެނީ، މި މަހު 11 މީހަކަށް ބަލި ޖެހިއްޖެ،
އައިކޮމްގެ އަޑުއެހުމަށް ހާޒިރުނުވެނުނީ މުވައްޒަފެއްގެ އިހުމާލުން: ހައުސިން މިނިސްޓްރީ
ނަތަންޔާހޫ ހައްޔަރުކުރަން އައިސީސީން ކުރި އަމުރަށް ރައީސް މަރުހަބާ ވިދާޅުވެއްޖެ
ރާއްޖެ އާއި އިންޑިއާގެ ދެމެދު ރުޕީސް އާއި ރުފިޔާ އިން މުއާމަލާތް