ރާއްޖެ އިން އިޒްރޭލު ޕާސްޕޯޓު މަނާކޮށްފިނަމަ ރާއްޖޭގެ އިގުތިސޯދު ފުނޑި، ރައްޔިތުންނަށް އުފަލުގައި ދިރިނޫޅެވޭ ވަރަށް ކަންކަންދާނެ ކަމަށް ރައްޔިތުން މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް މިއަދު ވިދާޅުވެއްޖެ އެވެ.
ސަރުކާރުގެ ފަރާތުން މަޖިލީހަށް ހުށަހަޅައިފައިވާ އިންޝުއަރެންސް ބިލަށް ބަހުސް ކުރައްވަމުން އެމްޑީއޭގެ މެންބަރު، އައްބާސް ވިދާޅުވީ އިޒްރޭލު ޕާސްޕޯޓް މަނާކުރަން އެމްޑީޕީން ގޮވަނީ ރާއްޖޭގެ ޓޫރިޒަމް ބައިކޮޓް ކުރުމުގެ މަގުސަދުގައި ކަމަށެވެ. އެގޮތުން ސަރުކާރުން، އިޒްރޭލު ޕާސްޕޯޓް މަނާކޮށްފި ނަމަ ޔޫރަޕްގެ ގައުމުތަކުން ފިއްތުންތައް އަންނާނެ ކަމަށް ވިދާޅުވި އެވެ.
”މުޅި ޔޫރަޕު އުތުރިއަރާނެކަން އިޒްރޭލުގެ ޕާސްޕޯޓު މަނާކުރާއިރަށް. އެ ހިސާބުން ރާއްޖޭގެ އިގުތިސޯދު ފުނޑުފުނޑު ކޮށްލެވޭނެކަން އެ މީހުންނަށް (އެމްޑީޕީއަށް) އެބަ އެނގޭ. އެ މީހުން ބޭނުމެއް ނުވޭ މި ފަސް އަހަރު ދުވަސް ތެރޭގައި ރާއްޖޭގެ ރައްޔިތުން އުފަލާ އަރާމުގައި ހިތްހަމަޖެހިގެން އުޅޭކަށް،“ އައްބާސް ވިދާޅުވި އެވެ.
އޭނާ ވިދާޅުވީ އިޒްރޭލު ޕާސްޕޯޓް ރާއްޖެ އިން މަނާކޮށްފިނަމަ، ޔޫރަޕުގައި ދިރިއުޅޭ ޔަހޫދީން އެކަމާ ކެކިއަރައިގަންނާނެ ކަމަށެވެ. އަދި އިޒްރޭލުގެ އާބާދީގައި މުސްލިމުން ވެސް ހިމެނޭއިރު އިޒްރޭލުގެ ގިނަ ރައްޔިތުންނަކީ އެހެން ގައުމެއްގެ ޕާސްޕޯޓްވެސް އޮންނަ ބަޔަކަށްވުމުން، އިޒްރޭލު ޕާސްޕޯޓް މަނާކޮށްގެން ހާސިލުކުރަން ބޭނުންވާ ކަންކަން ހާސިލު ނުވާނެ ކަމަށްވެސް ވިދާޅުވި އެވެ.
އިޒްރޭލުގެ މީހުން ރާއްޖެ އަށް އެތެރެވޭ ގޮތަށް އޮންނަ އޮތުން ބަދަލުކުރަން އިމިގްރޭޝަން ގާނޫނަށް އިސްލާހު ގެންނަން ގަލޮޅު އުތުރު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމު މަޖިލީހަށް ހުށަހެޅުއްވީ މިދިޔަ މެއި މަހުގެ ތެރޭގަ އެވެ.
އެ ބިލު ބަލައިގަނެ، 241 ކޮމިޓީއަށް ފޮނުވުނީ މަހެއްހާ ދުވަސް ފަހުން މިދިޔަ ޖޫން މަހުގެ 10 ވަނަ ދުވަހު އެވެ. ނަމަވެސް އެ ފަހުން އެ ބިލުގެ އެއްވެސް މަސައްކަތް ކޮށްފައެއް ނުވެ އެވެ.
އެ ބިލް މަޖިލީހަށް ހުށަހަޅާފައިވަނިކޮށް، އިޒްރޭލުގެ މީހުން ރާއްޖެ އެތެރެވިޔަ ނުދިނުމަށްޓަކައި ގާނޫނަށް ގެންނަންޖެހޭ އިސްލާހުތައް ގެންނަން ކެބިނެޓްގެ ބައްދަލުވުމުގައި ރައީސް ޑރ. މުހައްމަދު މުއިއްޒު ނިންމެވި އެވެ.
އެގޮތަށް ކެބިނެޓުން ނިންމިއިރު ރައީސްގެ ރިޔާސީ ގަރާރަކުން އެކަން ކުރެވޭނެ ކަމަށް ބައެއް މީހުން ދަނީ ބުނަމުންނެވެ.
ފަލަސްތީނުގެ ނަސްލު ނައްތާލަން އިޒްރޭލުން ދޭ ހަމަލާތަކާ ގުޅިގެން، އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާކުރަން ގާނޫނަށް އިސްލާހު ގެންނަން ހުށަހެޅީ އިދިކޮޅު އެމްޑީޕީން ވިޔަސް، އެ ބިލަށް ތާއީދު ކުރާނެ ކަމަށް ޕީއެންސީގެ ޕާލަމެންޓަރީ ގުރޫޕުގެ ލީޑަރު އިބްރާހިމް ފަލާހު ވަނީ ވިދާޅުވެފަ އެވެ.
އެކަމަށް ސަރުކާރުން އާ ބިލެއް ހުށަހެޅުމުގެ ބަދަލުގައި ސަރުކާރުން ގެންނަން ބޭނުންވާ އިސްލާހުތައް ކޮމިޓީއަށް ހުށަހަޅައިގެން ކުރިއަށްދާނެ ކަމަށް ބަންޑާރަ ނައިބު އަހުމަދު އުޝާމް ވެސް ވަނީ ވިދާޅުވެފަ އެވެ.
116 Comments
ގުޅުންހުރި
ރައީސް ވިދާޅުވީ އެންމެ އިސްކަންދޭ އެއްކަމަކީ ރާއްޖެ ޑުރަގުން އެއްކޮށް ސަލާމަތްކުރުން
ބޮަޑު ޑްރަގް ބަސްޓެއް! ލަންކާގެ ބޯޓަކުން އެއް ބިލިއަން ރުފިޔާގެ ޑްރަގު
ހޯކްސްގެ ބޯޓަކުން ވަގަށް ސިނގިރޭޓް އެތެރެކުރުން: އިހުސާން އާއި އަމީން ކޮމިޓީއަށް
ސިއްރު ބައްދަލުވުމެއްގައި އޭސީސީ އާއި އީސީގެ 5 މެންބަރަކު ވަކިކުރަން ފާސްކޮށްފި
މަޖިލިސް މެންބަރުންގެ ގޮނޑި ގެއްލޭ ގޮތަށް ގެނައި އިސްލާހު ބާތިލުކުރަން ސުޕްރީމް
ކަނޑުހުޅުދޫގައި ޑުރަގު މައްސަލައެއްގައި ތޫނު ހަތިޔާރު ބޭނުންކޮށްގެން މާރާމާރީއެއް ހިންގައިފި