ޓެކްސް އެޕީލް ޓްރައިބިއުނަލްގެ ހަތަރު މެންބަރަކު މަގާމުން ވަކިކުރަން ރައްޔިތުންގެ މަޖިލީހުން ރައީސް ޑރ. މުހައްމަދު މުއިއްޒަށް ލަފާދެއްވާފައިވާތީ އެ ހަތަރު މެންބަރުން މިއަދު މަގާމުން ވަކިކުރައްވައިފި އެވެ.
ޓެކްސް ނެގުމާބެހޭ އިދާރީ ގާނޫނުގައި ބަޔާންކޮށްފައިވަނީ ޓެކްސް ޓްރައިބިއުނަލަށް މެންބަރުން އައްޔަންކޮށް، ވަކިކުރައްވާނީ ރައީސުލްޖުމްހޫރިއްޔާ ކަމަށެވެ.
ޓެކްސް އެޕީލް ޓްރައިބިއުނަލުން ވަކިކުރި މެންބަރުން:
- މުހައްމަދު މުނައްވަރު އަލީ – ރައީސް
- ހުސައިން ޒައިދާން ޖަލީލް – ނައިބު ރައީސް
- އަހުމަދު އަޝްރަފް – މެންބަރު
- ހަދީޖާ ނައީމް – މެންބަރު
ޓެކްސް އެޕީލް ޓްރައިބިއުނަލްގެ އެ މެންބަރުން ވަކިކުރަން ރައީސަށް ލަފާ ދޭން މަޖިލީހުން މި މަހުގެ 19 ވަނަ ދުވަހު ފާސްކުރީ، އެ ހަތަރު މެންބަރުންނަށް ތުހުމަތުކޮށް ޓްރައިބިއުނަލްގެ ފަސް މެންބަރުންގެ ތެރޭގައި ހިމެނިވަޑައިގަންނަވާ އިސްމާއިލް ސާޖިދު ރައްޔިތުންގެ މަޖިލީހުގެ އިދާރާއަށް ހުށަހެޅި މައްސަލައެއް ޖުޑިޝަރީ ކޮމިޓީން ބެލުމަށްފަހު އެވެ.
ނަމަވެސް އެ މައްސަލައާ ގުޅިގެން ކޮމިޓީން މައްސަލަ ބެލީ ބައްދަލުވުންތައް ސިއްރު ކޮށްގެންނެވެ. ކޮމިޓީން ވަނީ އެ މައްސަލަތަކާ ގުޅިގެން އެ ޓްރައިބިއުނަލްގެ ވަކިވަކި މެންބަރުންނާއި ރެޖިސްޓްރާ އަބްދުﷲ ހިލްމީއާއި ބައްދަލު ކުރައްވައި އަދި އެތަނަށް ކޮމެޓީގެ މެމްބަރުން ޒިޔާރަތްކޮށް، ހާލަތު ބައްލަވައިފަ އެވެ.
އެއަށްފަހު ޖުޑީޝަރީ ކޮމިޓީން ވަނީ ކޮމިޓީން ފާސްކޮށް ރެކޮމެންޑޭޝަންތަކެއް ހިމަނައި، ކަމާބެހޭ ރިޕޯޓެއް މަޖިލިސް ތަޅުމަށް ފޮނުވައިފަ އެވެ. އޭގެ ތެރޭގައި މައްސަލަ ހުށަހެޅި މެންބަރު ފިޔަވައި އަނެއް ހަތަރު މެންބަރުން ވަކިކުރުމުގެ އިތުރަށް ފާހަގަކުރި ކަންކަމަކީ:
- ޓްރައިބިއުނަލް ބައެއް މެންބަރުންގެ މައްޗަށް މަގާމުގެ ނުފޫޒު ބޭނުން ކުރުމާއި ނުހައްގު މުއްސަނދިކަން ހޯދިކަމަށް ތުހުމަތު ކުރެވޭތީ، ތަހުގީގު ކުރުމަށް އޭސީސީއަށް ހުށަހެޅުން
- ޓްރައިބިއުނަލް ހިންގާ އިމާރާތަކީ އެކަމަށް ބޭނުންވާވަރަށްވުރެ ބޮޑު އިމާރާތަކަށްވާތީ، ދައުލަތަށް މާލީ ބުރަ ކުޑަކުރަން ހުށަހެޅުން
- ޓްރައިބިއުނަލްގެ މައްސަލަތަކުގެ ބެންޗާއި ބެންޗްގެ ރިޔާސަތު ކަނޑައެޅުމުގެ ބާރު ރައީސަށް ދީފައި އޮތް އޮތުން ބަދަލުކޮށް، ގަވައިދު އިސްލާހު ކުރުން




ގުޅުންހުރި
ރައީސް ޔޫކޭއަށް، މި އަހަރުގެ ތެރޭ ޔޫކޭއަށް ކުރައްވާ ތިންވަނަ ދަތުރުފުޅު
ރޯދައިގެ ކުރިން އާ 15 މިސްކިތެއް ހުޅުވޭނެ: ރައީސް
ރައީސްގެ ބައްދަލުވުންތަކުގެ ކުރިން ސުވާލު ނުވަތަ ހިޔާލު ހުށަހަޅަން ނުޖެހޭނެ: ހީނާ
ނުރައްކާތެރިކޮށް ވެހިކަލް ދުއްވާނަމަ 20 އަހަރަށް ޖަލަށްލެވޭ ގޮތް ހަދަނީ
ކައުންސިލްތަކުގެ ސައިޒް ކުޑަކުރުމަށް މަޖިލީހުން ފާސްކޮށްފި
އަނބިމީހާއަށް 15،000 ރުފިޔާ ދޭންޖެހޭ، އަތަކު އެކައްޗެއް ވެސް ނޯވޭ: އައްބާސް