ރަށެއްގެ ބަނދަރަށް ވަންނަން ވާދަޖެހި ކަމަށް ބުނާ ލޯންޗުތަކުގެ މައްސަލަ ބަލަނީ

އއ. ތޮއްޑޫ ބަނދަރަށް ވަންނަން ވާދައަށް ދުއްވި ލޯންޗުތަކުގެ މައްސަލައެއް މެރިން ޕޮލިސްއިން ބަލަން ފަށައިފި އެވެ.

މާލެ އިން ފުރައިގެން ތޮއްޑުއަށް ދިޔަ ލޯންޗުތަކެއް އެ ރަށު ބަނދަރަށް ވަންނަން ވާދަޖެހި ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ.

އެ ވީޑިއޯގައި ފެންނަނީ ތޮއްޑު އާއި މާލެއާ ދެމެދު ދަތުރުކުރާ ’ނަސްރު ސްޕީޑް‘ ލޯންޗު ދުވަލި ބާރުކޮށް، ’ރިލެކްސް ގޯލްޑް‘ ނަމަކަށް ކިޔާ ލޯންޗަށްވުރެ ކުރި އަރައިގެން ގޮސް ބަނދަރަށް ވަންނަ މަންޒަރެވެ. އެ ލޯންޗުތަކުގެ ފަހަތުން ”ރަމްޒު ކުއީން“ ލޯންޗް ވެސް ވަންނަތަން ވީޑިއޯ އިން ފެނެ އެވެ.

ފުލުހުން މިއަދު މީޑިއާތަކަށް ބުނީ، ވީޑިއޯގައި ހިމެނޭ ލޯންޗުތަކަކީ 13 އޮގަސްޓް 2024 ގައި އއ. އަތޮޅަށް ދަތުރުކުރި ލޯންޗުތަކެއްކަން މިހާތަނަށް ބެލިބެލިމުން އެނގޭ ކަމަށެވެ.

އެ މައްސަލަ ތަހުގީގު ކުރަމުން އަންނައިރު، މައްސަލައާ ގުޅިގެން އަދި މީހަކު ހައްޔަރުކޮށްފައި ނުވާ ކަމަށްވެސް ފުލުހުން ބުންޏެވެ.