ފެނަކައިގެ އެމްޑީގެ މަގާމުން މުއާޒް އިސްތިއުފާދެއްވައިފި

ފެނަކަ ކޯޕަރޭޝަންގ އެމްޑީގެ މަގާމުން މުއާޒް މުހައްމަދު އިސްތިއުފާދެއްވައިފި އެވެ.

މުއާޒް އިސްތިއުފާ ދެއްވައި ރައީސް ޑރ. މުހައްމަދު މުއިއްޒުއަށް ފޮނުއްވި ސިޓީގައި ވިދާޅުވީ ފެނަކައިގެ މެނޭޖިން ޑިރެކްޓަރުގެ މަގާމަށް އައްޔަން ކުރެއްވި ދުވަހުން ފެށިގެންވެސް މަސައްކަތް ކުރެއްވީ އިހުލާސްތެރިކަމާއެކުގައި ކަމަށެވެ. އަދި މިވީ އެއް އަހަރު ދުވަހުގެ ތެރޭގައި ގޮންޖެހުންތަކާއެކު ވެސް ފެނަކައިން ރައްޔިތުންނަށް ފޯރުކޮށްދޭ ހިދުމަތްތައް މެދުނުކެނޑި ފޯރުކޮށްދިނުމުގައި އެދެވޭ ނަތީޖާއެއް ހާސިލް ކުރެވިފައިވާ ކަމަށް މުއާޒް ވިދާޅުވި އެވެ.

އޭނާ ވިދާޅުވީ ކުންފުނިތައް ހިންގުން ބައްޓަން ކުރަންޖެހެނީ އެ ކުންފުންޏަކަށް ލިބޭ އާމްދަނީއަކުން ކަމަށްވިނަމަ ވެސް ފެނަކައިގެ މާލީ ހާލަތު ދަށްވުމުގެ ސަބަބުން އެކަން ކުރެވެން ނެތް ކަމަށެވެ. އެގޮތުން، ކުންފުންޏާ ހަވާލުވިރު 4.3 ބިލިޔަން ރުފިޔާގެ ދަރަންޏެއް އޮތުމާއެކު ކުންފުންޏަށް އެކަށީގެންވާވަރަށްވުރެ ގިނައިން ވަޒީފަ ހަމަޖައްސަން ޖެހުމާއެކު ކުންފުނި ރައިޓް ސައިޒްކުރުމަށް އެކަށީގެންވާ އެއްބާރުލުމެއް ކަމާ ގުޅުންހުރި އިދާރާތަކުން ނުލިބޭ ކަމަށް މުއާޒް ވިދާޅުވި އެވެ. އަދި ކުންފުންޏަށް ލިބިފައިވާ އާމްދަނީއަށްވުރެ ކުރަންޖެހިފައިވާ ހަރަދުތައް ގިނަ ކަމަށް މުއާޒް ވިދާޅުވި އެވެ.

އެ ގޮންޖެހުންތަކާއެކު ވެސް ފާއިތުވި އެއް އަހަރު ދުވަހު ކުންފުންނީގެ ހިންގުން ހަރުދަނާކޮށް ހަރަދުކުޑަކުރަން ގިނަ މަސައްކަތްތަކެއްކޮށް ނަތީޖާ ނެރެދީފައިވާ ކަމަށް މުއާޒް ވިދާޅުވި އެވެ. އެގޮތުން، މިއަހަރުގެ އޮކްޓޯބަރު މަހުގެ ނިޔަލަށް 160 މިލިޔަން ރުފިޔާއަށްވުރެ ބޮޑު އަދަދެއް ހިންގުމުގެ ހަރަދުން ސަލާމަތްކުރެވިފައިވާކަން މުއާޒް ފާހަގަކުރެއްވި އެވެ.

މުއާޒް ވިދާޅުވީ ހަމައެކަނި ހިންގުމުގެ ހަރަދު ކުޑަކޮށްގެން މިހާރު އެ ކުންފުނި ވެއްޓިފައިވާ މާލީ ހާލަތުން ސަލާމަތް ނުކުރެވޭނެ ކަމަށެވެ. އަދި އާމްދަނީއަށްވުރެ ކުރަންޖެހޭ ހަރަދު ބޮޑުވުމުން ދެމެހެއްޓެނިވި ގޮތެއްގައި ހިދުމަތްތައް ފޯރުކޮށްނުދެވޭ ހާލަތަކަށް ކުންފުނީގެ އޮޕަރޭޝަން ހާލަތު ވެއްޓިފައިވާ ކަމަށްވެސް ވިދާޅުވިއެވެ.

މި އަހަރުގެ އޮކްޓޯބަރު މަހާއި ނޮވެމްބަރު މަހުގެ މުސާރަ ވެސް، މަސް ފެށުނުއިރު ވެސް ޖަމާކޮށް ނުދެވުނު ކަމަށް ވަނީ ވިދާޅުވެފައެވެ. މީގެ އިތުރުން މާލީ ވުޒާރާގައި ވެސް އެތައް ފަހަރަކު ހައްލަކަށް އެދި ދެންނެވި ކަަމަށް މުއާޒު ވިދާޅުވިއެވެ.

އެއާއެކު މުއާޒު ވިދާޅުވީ، ކުންފުނީގެ ހަރަދު ބޮޑުވެ، ދެމެހެއްޓެނިވި ގޮތެއްގައި އޮޕަރޭޝަން ފޯރުކޮށް ނުދެވޭނެ ހާލަތަކަށް ކުންފުނި ވެއްޓިފައިވާތީއާއި، އޭނާ ހުރެގެން އިތުރަށް އެ ކަން ރަނގަޅުކުރެވޭނެ މަގެއް ނުފެންނާތީ މަގާމުން އިސްތިއުފާ ދެއްވާކަމަށެވެ.