މިއަހަރާ އެއްގޮތަށް މިއަންނަ އަހަރަށް ވެސް އެސްޓީއޯއިން ޑިޖިޓަލް ކަލަންޑަރެއް!

ސްޓޭޓް ޓްރޭޑިން އޯގަނިޒޭޝަން (އެސްޓީއޯ) އިން މިއަހަރަށް ތައާރަފުކުރި ޑިޖިޓަލް ކަލަންޑަރަށް އަޕްޑޭޓް ކުރުމަށްފަހު މިއަންނަ އަހަރަށް ވެސް ތައާރަފުކުރަން ނިންމައިފި އެވެ.

އެސްޓީއޯއިން މިއަދު ބުނީ އެ ކުންފުންޏަކީ ވިޔަފާރީގަޔާއި ކުންފުނީގެ އާންމު ހިންގުމުގައި ސަސްޓެއިނަބިލިޓީ، އިނޮވޭޝަން ،އަދި ޑިޖިޓަލް ޓްރާންސްފޯމަޝަން ވިސްނުމުގެ ދަށުން މަސައްކަތް ކުރާ ކުންފުންޏެއް ކަމަށެވެ.

އެގޮތުން 2024 ވަނަ އަހަރު ތައާރަފްކުރި އޮފީސް މޭޒުތަކާއި ގޭތެރޭގައި ބެހެއްޓުމަށް ވެސް މަގުބޫލު ”އެސްޓީއޯ ޑިޖިޓަލް ކަލަންޑަރު“ ވެގެންދިޔައީ އެސްޓީއޯގެ އެ ވިސްނުންތަކުގެ މައްޗަށް އެޅުނު ބިންގަލެއް ކަމަށް އެސްޓީއޯއިން ބުންޏެވެ.

”މިބިންގަލާއެކު އެސްޓީއޯއިން ކުރީ އަހަރުތަކާ ހިލާފަށް 2025 ވަނަ އަހަރަށް ވަނީ މި ކަލަންޑަރު ސޮޕްޓްވެއާ އަޕްޑޭޓާއެކު ’ރިޔޫސް‘ ކުރުމަށް ނިންމާފަ އެވެ. މި ނިންމުމަކީ އެސްޓީއޯ ހިންގުމުގައި ގެންގުޅޭ ދެމެހެއްޓެނިވި ވިސްނުންތަކާއި އުސޫލުތަކާއެކު، އެސްޓީއޯގެ ޕޭޕާލެސް ޕޮލިސީގެ ދަށުން ތިމާވެއްޓަށް ކުރާ އަސަރު ކުޑަކުރުމަށް ކުރަމުންދާ މަސައްކަތްތަކަށް އިތުރު ބާރުދިނުމަށް ނިންމާފައިވާ ނިންމުމެކެވެ. އަދި 2025 ވަނަ އަހަރުގެ ސޮފްޓްވެއާ އަޕްޑޭޓާއެކު މިފަހަރު ވެސް އެސްޓީއޯ ޑިގިޓަލް ކަލަންޑަރު ވެގެންދާނީ އިތުރު ފަސޭހަތަކެއް ލިއްބައިދޭ, މަގުބޫލު ވަސީލަތަކަށް ކަމުގައި ކުންފުނިން ޔަގީންކުރަމެއެވެ.“ އެސްޓީއޯއިން ބުންޏެވެ.

ކަރުދާހަށް ކުރާ ހޭދަ ކުޑަކުރުމުގެ ސިޔާސަތުގެ ދަށުން ކުންފުނީގެ ހިންގުމުގައި ކަރުދާސް ބޭނުންކުރާ މިންވަރު ވަނީ ވަރަށް ބޮޑުތަނުން ދަށްކުރެވިފައި ކަމަށް އެސްޓީއޯއިން ބުންޏެވެ. އަދި ބުނީ ޕްރިންޓްކުރާ ކަލަންޑަރުތައް އުފެއްދުމާއި އުފުލުމުގައި ކާބަން ބޭރުވާ މިންވަރު ހީވެސް ނުކުރާހާ މަތި ކަމަށާއި މީގެ ކުރިން އެސްޓީއޯއިން އައީ އަހަރެއްގެ މައްޗަށް އާންމުކޮށް އަށެއްކަހާސް ކަލަންޑަރު ޕްރިންޓު ކުރަމުން ކަމަށް އެސްޓީއޯއިން ބުންޏެވެ. ނަމަވެސް ޑިޖިޓަލް ކަލަންޑަރުގެ ސަބަބުން އަލުން ޕްރިންޓްކުރަން ނުޖެހި، ކުނި އުފެދުމާއި ތިމާވެއްޓަށް ދެވޭ ގެއްލުން ވަރަށް ބޮޑަށް ކުޑަކުރެވިގެންދާނެ ކަމަށް އެސްޓީއޯއިން ބުންޏެވެ.

އެސްޓީއޯއިން މިއަހަރާ އެއްގޮތަށް މިއަންނަ އަހަރަށް ވެސް ޑިޖިޓަލް ކަލަންޑަރެއް ނެރުމުގެ ސަބަބުން ތިމާވެއްޓަށް ފައިދާވެގެންދާނެ ކަމަށް އެސްޓީއޯއިން ބުންޏެވެ. އެގޮތުން ކަރުދާސް އުފެއްދުމުގެ ބޭނުމުގައި ގަސް ކެނޑުމުން މަދުވުމާއި ކުނިގޮނޑުތަކަށް އުކާލެވޭ ކުނި މަދުވުމުގެ އިތުރުން ކާބަން ފުޓްޕްރިންޓް ކުޑަވެގެންދާނެ ކަމަށް އެސްޓީއޯއިން ބުންޏެވެ. ކޮންމެ އަހަރަކު ކަލަންޑަރު ޕްރިންޓްކުރުމަށް ގިނަ އަދަދެއްގެ ކަރުދާހާއި ދެލި ބޭނުން ކުރުމުގެ ސަބަބުން ގަސްކެނޑުމާއި ތިމާވެށި ތައައްޔަރުވުމަށް މަގުފަހިވާ ކަމަށް އެސްޓީއޯއިން ބުންޏެވެ.

”ކޮންމެ އަހަރަކު އައު ކަލަންޑަރެއް ތައާރަފްކުރުމަށް އެތަކެއް ވަގުތާއި ވަސީލަތެއް ހޭދަވޭ. ރިޔޫސް ކުރެވޭ ޑިޖިޓަލް ކަލަންޑަރުގެ ސަބަބުން މިލިއަނުން ސަލާމަތްކުރެވި، އެހެނިހެން ކަންކަމަށް މިވަސީލަތްތައް ރިލޮކޭޓްކުރެވޭ. މި އިސްނެގުމުގެ މައިގަނޑު އެއް ބޭނުމަކީ އިސްރާފު މަދުކުރުމުގެ އިތުރުން ދެމިއޮންނަ އަގު އުފެއްދުމަށް އެސްޓީއޯއިން ކުރާ މަސައްކަތެވެ“ އެސްޓީއޯއިން ބުންޏެވެ.

މީގެ އިތުރުން އެސްޓީއޯއިން ބުނީ ކޮންމެ އަހަރަކު އާ ކަލަންޑަރެއް އުފެއްދުމަށް ބޮޑެތި ވަސީލަތްތައް ހޭދަކުރުމުގެ ބަދަލުގައި އެއްފަހަރަށްވުރެ ގިނަފަހަރު ބޭނުންކުރެވޭ އޯލްޓަނޭޓިވްތައް އިހްތިޔާރުކުރުމަށް އެހެން ފަރާތްތަކަށްވެސް ހިތްވަރުދީ ގޮވާލާ ގޮވައިލާ ކަމަށެވެ.