މާލެ ސަރަހައްދުގައި ވައި ނުސާފު، ލޮލަށް ފެންނަ ދުރުމިން 2 ކިލޯމީޓަރުގައި!

މާލެ ސަރަޙައްދުގެ ވައި ނުސާފުވެ، ލޮލަށް ފެންނަ ދުރުމިން 2 ކިލޯމީޓަރަށްވުރެ ދަށަށް ގޮސްފައިވާ ކަމަށް މެޓު އޮފީހުން ބުނެފި އެވެ.

މެޓުން ބުނީ މިއީ އާންމު ދުވަސްތަކާ އަޅާބަލާއިރު ވަރަށް ބޮޑު ތަފާތެއް ކަމަށެވެ. މެޓުން ބުނީ ވައި ސާފު ދުވަސްތަކުގައި 10 ކިލޯމީޓަރަށްވުރެ ދުރަށް ފެންނަ ކަމަށެވެ.

މާލޭ ސަަރަހައްދުގެ އިތުރުން ހަނިމާދޫއަށް ވެސް ވައި ނުސާފު ކަމަށް މެޓުން ބުންޏެވެ. ހަނިމާދޫގައި ލޮލަށް ފެންނަ ދުރުމިން އުޅެނީ 6 ކިލޯމީޓަރުގައި ކަމަށް މެޓުން ބުންޏެވެ.

އަދި އުތުރާއި މެދުރާއްޖެތެރޭގެ ރަށްތަކަށް ވެސް ވައި ނުސާފުވާނެ ކަމަށް ލަފާކުރެވޭ ކަމަށް މެޓުން ބުންޏެވެ.

މި ދުވަސްވަރު ރާއްޖޭގެ ވައި ނުސާފުވަނީ ރާއްޖޭގެ އިރުމަތިން ބޭރުން އަންނަ ދުމުގެ ސަބަބުން ކަމަށް މެޓުން ފާހަގަކޮށްފައިވެއެވެ. މިއީ ކޮންމެ އަހަރެއްގެ ވެސް މި މޫސުމުގައި ދިމާވާ ކަމެކެވެ.